Қазақ оқырманын құттықтайық деген мақсатпен жазып отырмыз
жүктеу/скачать 19,34 Kb.
|
Талтүс
| Қуанышты жаңалық
10 октября 2019 Оқылды: 2 531
Жақында әлеуметтік желі беттерінен мыңдаған кітап оқып, қазақ әдебиетін қойып, жапон әдебиетін оқыған, шығыс пен батыс әдебиеттеріне баға беріп отыратын бір жігіттің жазбасын оқыдым. – «Оқыған адам ретінде қазақ әдебиеті мені таңқалдырады деп ойламайтынмын. Мені қазақ әдебиетіне қайта әкелген адам, таңқалдырған автор – Таласбек Әсемқұлов», — деген екен. Расында Таласбек Әсемқұлов қалам тербемеген тақырыптар санаулы ғана. Жә, бұл туралы емес… Қазақ оқырманын, қазақ халқын құттықтайық деген мақсатпен жазып отырмыз. Индиана университетіне қарасты «Three String Books» баспасында жаңа кітап жарыққа шықты. Аты – «A Life At Noon». Қазақшасы – «Талтүс». Авторы – Таласбек Әсемқұлов. Мақтануға тұрарлық дүние деп түйдік. Себебі, бұл – біз тамсана қарайтын батыс әлемінің өз ықыласымен, өз ақшасымен аударып, авторға қаламақы төлеп шығарған тұңғыш қазақ шығармасы. Осыған дейін қазақ авторлары тек өз талпынысымен аударылатын. Мемлекет қолдауымен шыққан жобалар да болды. Бірақ, Батысты мойындатқан осы жалғыз қазақ авторы. Кітап қазір «AMAZONE» әлемдік интернет дүкенінде сатылымда. Бұл да қазақ авторлары үшін тұңғыш қадам, тың іс. «Талтүс» – Таласбек Әсемқұловтың көзі тірісінде жарыққа шыққан жалғыз роман. Романда автордың балалық шағы, қазақ әндер мен күйлері туралы, ақсақалдар айтар әңгімелер мен аңыздары, өнер мен өмір жайы баяндалады. Әуелі роман 2003 жылы Қазақстанда жарыққа шықты. Бүгінде «Талтүстің» ағылшын, француз, испан, қытай, орыс, араб сынды алты тілдегі аудармасы әлемдік деңгейде қайта басылып отыр. Шығарма Испания, Франция, Ұлыбритания секілді бірқатар елдердегі оқырмандар қолына тиіп, ыстық ықыласына бөленіп үлгерді. Бұлай көсілуімізге себеп – аталмыш елдердегі оқырмандардың алғысы мен жылы лебіздері. Қазақстан жазушылар одағының, Қазақстан Республикасының мемлекеттік деңгейде әдебиетке көңіл аударғанының анық дәлелі де осы іспетті. Биылдың өзінде елімізде Азия, Еуразия жазушылар форумы, жас ақын-жазушылар форумы ұйымдастырылып, тарихи-эпостық, фольклорлық шығармалардың көптомдықтары мен жекелеген авторлардың тырнақалды туындылары көптеп шығарыла бастады. Келер ұрпаққа қалдырар баға жетпес байлықтың бірден-бірі әдеби шығармалар екенін саналы түрде енді ұққандаймыз. Көңілге медеу, жазуға ынта берер жаңалық та осы! Кітаптың аударылуына көмек көрсеткен автордың бауырларына, жарына оқырман атынан алғыс айтамыз! Әр авторға осындай жемісті еңбек тілейміз! Сұлтан Мұстафин Ruh.kz Фото: ашық дерек көздерден жүктеу/скачать 19,34 Kb. Достарыңызбен бөлісу:
|