Дипломдық ЖҰмыс 6В01301 Бастауыш оқытудың педагогикасы мен әдістемесі

Ғылыми жетекші: Абдуллаева П.Т.

Осы орайда, Елбасы Н. Назарбаевтың: «... Бізге бұрынғы қай кездегіден де білім мен ғылымның баға жеткізгісіз қорын барынша арттыру, оны қазіргі заманға сай ету қажет» деген сөзі егеменді елімізде білім мәселесіне мемлекет тарапынан қаншалықты көңіл бөлініп отырғанын дәлелдейді [1].

Соңғы жылдардағы Қазақстанның қоғамдық-саяси өміріндегі болған өзгерістер оқыту, тәрбиелеу ісіне де жаңалықтар енгізіп, жаңа леп әкелді. Ғылым мен техниканың дамуы, қоғамның өсіп-өркеңдеуі, еліміздің өркениетті елдер қатарынан орын алуы оның білім беру жүйесінің даму дәрежесімен тығыз сабақтасады. Осыған байланысты білім беру жүйесінде жас ұрпақты оқыту мен тәрбиелеудің технологиясын жаңартуға бағытталған көптеген міндеттер жүзеге асуда.

Заман талабына сай қазақ тілімен берге орыс, ағылшын тілдерін оқыту үшін оқушыларға деңгейлік тапсырмалар беру арқылы олардың сөйлеу дағдыларын да сапалы қалыптастыруға болады. Себебі, қазіргі таңда мектеп оқушыларының ойлау мен сөйлеу әрекетін дамыту күн тәртібіне өткір қойылуда. Ал, сөйлеу ауызша және жазбаша болатыны белгілі. Оқушының жазбаша сөйлеу икемділіктерін дамытуда қазақ тілі мен ана тілі пәнін,оған қоса ағылшын,орыс тілдерін оқытудың маңызы ерекше.

Сөздердің жасалу жолдарын, олардың өзара байланысу тәсілдерін, түрлі мағыналық реңктерін оқушыларға үйрету, олардың ой-өрісін дамыту, танымын кеңейту, тіл байлығын жетілдіру деңгейлік тапсырмалармен тығыз байланысты. Деңгейлік тапсырмалар — жеңілден қиынға, қарапайымнан күрделіге қарай сатылы түрде орындалатын жұмыстар жүйесі. Деңгейлік тапсырмалар арқылы оқыту оқушылардың қазақ тіл білімінің барлық саласы бойынша алған білімін тереңдете түсу мақсатында қолданылады. Деңгейлік тапсырмалармен жұмыс жүргізу, біріншіден, оқушының жеке қабілетін ашуға, екіншіден, өзіне деген сенімін жетілдіруге, үшіншіден, пәнге деген қызығушылығын арттыруға, төртіншіден, сабақтың тиімді, сапалы әрі қызықты өтуіне жағдай жасайды. Сонымен қатар қазақ тілі сабағында оқушылардың білімін терендетудің бір жолы - оқу процесінде Блум технологияны ұтымды пайдалана білу. Педагогикалық технология үлгілері соңғы жылдары оқу процесінде тиімді рөл атқарып келеді.

Бүгінгі танда педагогикалық технология арқылы оқытудын жекелеген аспектілері саралап оқыту технологиясында, ынтымақтастық педагогикасы технологиясында, білім беруді ізгілендіру, ұжымдық оқыту, дамыта оқыту, модульмен оқыту, деңгейлеп оқыту технологияларына байланысты жан-жақты зерттелуде. Қазақстанның білім беру жүйесінде жаңа технология арқылы оқыту мәселесі Ж.А.Қараев, Қ.Қабдықайыров, Б.Баймұқанов, Г.Кусаинов, Б.Тұрғынбаева, Р.Жампейісова, М.Мусин, М.Мәлібекова, Б.Барсай, К.Жақсылықова, Қ.Қадашева, Р.Шаханова сияқты ғалымдардың зерттеулерінде қарастырылды.

Жоғарыдағы зерттеу жұмыстарында оқушылардың білімін, танымын, ойлау қабілеттерін деңгейлік тапсырмалар арқылы қалыптасуға болатыны дәлелденген. Бұл зерттеу жұмысының көкейкестілігін көрсетеді.