Мен өз саламның маманымын

Арманы жоқ бала бола ма? Жүйелі ой түйе бастағаннан сол балалық тәтті де биік армандарымыздың жетегінде жүріп ер жетеміз. Үлкендер «Өскенде кім боласың?» деген сұрақты жиі қоятын. Мектепте де «Кім болам?» деген тақырыпқа шығарма жазғанда арман-қиялымызға ерік беріп, шабыттанып, сонау болашаққа сапар шегетінбіз. Менің жазушы, суретші, тіпті дәрігер болғым келетін. Ақ қағаздың бетіне қаламмен түсірген ертегі, әңгімелерім елді тамсандырып жүрсе деген кез де болды. Көшеде жайқалып өскен гүлдер мен көкке атылған ағаш, тауларды қылқаламның күшімен сұлулықтың символына айалатын туынды жазғым келетін.

«Адамның дегені емес, Алланың дегені болады...» Бала күнімде әкем осы сөздерді жиі айтатын. Сонда осы сөздерге аса мән беріп, байыбына бара бермеппін. Уақыт өте келе адамның ойы мен дүниеге деген көзқарасы өзгереді екен. Мектеп қабырғасында жүргенде жазушы да, суретші де, болам деп, нақты шешім қабылдар кездің келерін түсіне бермеппін. Қолымызға аттестатты алып, шешім қабылдар кезде қатты қиналғаным әлі есімде. Осы кезде қандай мамандық иесі болғым келетінін өзім де нақты айта алмайтынмын. Тек шын жүрегіммен тілегенім қай мамандық болса да, адамдық атыма кір келтірмей, адал қызметкер болғым келді. Ата-ананың сенімін ақтап, елімнің үкілеген үміті екенімді естен шығармай, тәуелсіз мемлекетіміздің дамуына қолдан келгенше өз үлесімді қосу еді. Әкем айтқандай Алланың дегені болады...

Мұғалім деген мамандық қой, ал мен ізгілік пен мейірімге шақырар ұлағатты ұстаз болғым келеді.

Мақсатсыз адам қанатсыз құс сияқты, ұша алмайды. Ал, менің осы ұстаздық жолда алдыма қойған үлкен мақсатым бар. Ол жүректері мейірім мен ізгілікке толы, адал, еңбекқор, Отансүйгіш ұпақ тәрбиелеу.

Қазіргі білім мен ғылым дамыған ғасырда «Қазіргі заман педагогы қандай болу керек?» деген сұрақ кімді де болса толғандыратыны анық. Ия, мен –қазіргі заман педагогымын. Мен жас ұрпақты, кеудесінде оты жалындаған патриот ұрпақты тәрбиелеуде қандай міндеттер атқарып жүрмін?

Мақсатым-айқын, міндетім-біреу: ел еңсесін еселеу жолында аянбай еңбек етіп, білімнің алтын қазығын игерту. Олай болса, Елбасының мығым әрі мықты, сындарлы да салиқалы саясатын қолдай отыра, ел игілігі үшін бар күш-жүгерім мен білімімді сала бермекпін.
Туленова Бақытнұр Жасұзаққызы

Т.Тәжібаев атындағы жалпы орта мектебі

Технология пәнінің мұғалімі