Атмосфералық қысымның ауытқуы ауаның өзгеруіне себеп болады. Қысым жоғары болса, әдетте ауа райы да жақсы болып тұрады, ал төмендесе – күн бұлттанып, жауын – шашын болып, тұман түсіп, жел соғады. Атмосфералық қысымның сәл ғана ауытқуы мал денсаулығына пәлендей өзгеріс туғыза қоймайды. Алайда, қысым күрт ауысса сүтті сиырлардың сүті азайып, қоңы төмендейді, ал асыл тұқымды жылқылардың ішегі түйілетін жағдайлары жиі кездеседі. Тауға өрлеген сайын қысымның төмендігінен малдарда тау немесе биіктік ауруы пайда болады. Қаны аз және семіз мал аталмыш сырқатқа тез шалдығады. Бұл аурудың себебі артерия қанында оттегінің парциалды қысымының жетіспеуі, ұлпаларда оттегі азаяды, яғни гипоксия туындайды.
Тауға біртет-бірте баяу көтерілсе, мал атмосфералық қысымның төмендігіне жақсы бейімделіп, биік таулы жерде ұзақ уақыт жүре алады.
Мал организмінің тау жағдайына бейімделуі өкпе желдетілуінің, эритроцит санының және гемоглобин мөлшерінің ұлғаюына көп байланысты.
