Аударма айшыќтары

Аударма саласы қай елдің әдебиеті болмасын, негізгі жанр болып саналатынын көзі қарақты оқырмандарға түсіндіріп жатудың қажеті жоқ шығар. Өйткені әр мемлекетте тұратын ұлт пен ұлыстардың өмір салты, тарихы, әдет-ғұрыптары осы аударманың арқасында басқаларға жетіп, әдебиеттің осы саласы адамзат игілігіне айналатынын түсіну қиын емес. Кеңес Одағы кезеңінде Қазақстандағы аударма саласының дамып, шетел әдебиетінің, орыс классиктерінің туындылары қазақ оқырмандарына үздіксіз жетіп тұрғаны сол кезде оң-солын таныған қазақ оқырмандарына жақсы мәлім. Әлем әдебиетінің алыптары О. Бальзактың, В. Скоттың, В. Гюгоның, Э. Хемингуэйдің, Д. Лондонның, У. Теккерейдің, Т.Манның, Пиранделлонның, Ж. Амадудың, Л. Толстойдың, А.Чеховтың, Н. Гогольдың және басқа да көптеген авторлардың шығармаларын қазақ жұрты өз ана тілдерінде оқып, сол кездегі әрбір қоғамның өмір ағысын танып, ой елегінен өткізді. Міне, аударманың құдіреттілігі де осында жатыр. Алайда, Кеңес Одағы ыдырап, соның құрамында болып келген одақтас республикалар тәуелсіздік алған соң бұл сала да тоқырауға ұшырады. Дей тұрсақ та, соңғы бес-алты жыл көлемінде бұл сала қайтадан қолға алынып, біраз көркем дүниелер қазақ тілінде шыға да бастады. Бұл, әрине, мәдениетіміз бен әдебиетіміздің дамуына әсер ететіні даусыз. Осы мәселе төңірегінде газет тілшісі белгілі аудармашы, жазушы Сарбас Ақтаевқа жолығып, бүгінгі таңдағы бұл мәселенің жай-күйі туралы әңгімелесіп қайтқан еді. Төменде біз екі арада болған сұхбатты оқырмандар назарына ұсынып отырмыз.