Соқыр ішек, caecum тоқ ішектің басталатын жерінен оған жіңішке ішек құятын жерге дейінгі бірінші бөлігі, тік шамасы - 6 см, көлденеңі 7-7,5 см, қап тәрізді.Соқыр ішек оң жақ мықын шұңқырында орналасқан, кейде жоғары бауыр астын да да орналасады. Соқыр ішектің алдыңғы беті тікелей іштің алдыңғы қабырғасына жанасып жатады немесе одан үлкен шарбымен бөлінеді, артқы жағында мықын – бел бұлшық еті жатады.
Соқыр ішектің медиалды артқы бетінен, жіңішке ішек құятын жерінен 2,5-3,5 см төменде құрттәрізді өсінді, appendix vermiformis шығады. Оның ұзындығы мен орналасу қалпы көп өзгеріп отырады. Орташа ұзындығы - 8,6 см; 2% жағдайда 3 см, болмауы сирек. Қалыпты орналасқан соқыр ішекте құрт тәрізді өсіндінің 4 түрлі орналасу қалпы бар:
1) төмендеген қалыпта (40 - 45%). Егер өсінді ұзын болса, онда оның шеті кіші жамбас астауы қуысына келіп, кейде қабыну кезінде қуық пен тік ішекке жабысып кетеді;
2) латералды қалып (25%);
3) медиалды қалып (17-20%);
4) соқыр ішектің артқы жағында жоғарылаған қалыпта (13%). Аппендикстің шырышты қабығы лимфа тініне бай, иммундық жүйенің ағзасына жатады, қорғаныс қызметін атқарады. Соқыр ішек пен құрттәрізді өсінді жан - жағынан ішастармен жабылған.
Жоғарылаған жиек ішек, соқыр ішектің тікелей жалғасы , ол осы жерден жоғары және сәл артқа өтіп, бауырдың төменгі бетіне жетіп, сол жерде оң иілім түзіп, көлденең ішекке ауысады, ұзындығы – 12 см.
Көлденең жиек ішек, ең ұзыны (25 – 30 см) оң иілімнен көкбауырдың төменгі шетіндегі сол иілімге дейін созылады. Сол жерде екінші иілім жасап, төмендеген ішекке ауысады. Ол алдынан үлкен шарбымен жабылған, үстінен бауыр, өтқуық, асқазан, ұйқы безінің құйрықты бөліктерімен , көкбауырдың тө -менгі шетімен жанасады. Көлденең ішек артқы жағынан 12 елі ішек пен ұйқы безінің басын қиып өтіп, шажырқайы арқылы артқы іш қабырғасына және ұйқы безіне бекиді.
Төмендеген ішек, ұзындығы – 10 см, сол иілімнен төмен қарай іш қуысының сол жағымен өтіп, мықын қыры деңгейінде сигма тәрізді ішекке ауысады.
Достарыңызбен бөлісу: |
