ДАРҚАН ЖАН
Қиын екен жалғыздық серті деген,
Көп ауырдым кедейлік дертіменен.
Су татырмас сараңды білуші едім,
Жомарттық пен адалдық көрдім сенен.
Жақсыларға жүректің төрі лайық,
Алғыс айтпау оларға болар айып.
Бала, бауыр, ағайын, туыс та емес,
Азаматтық жасады Бөрібаев.
Қалған жоқпыз дұшпанның табасына,
Тасыған қан түскендей сабасына.
Мен тойынсам елімнің ықыласына,
Сен шомылдың халықтың батасына.
Тұсауласа тағдырдың тар төсегі,
Жалаң аяқ кей адам қар кешеді.
«Қолы ашықтың - жолы ашық» деген сөз бар
Дарқан жанның қашан да даңқы өседі.
Инабаттық жазған ба пейіліңе,
Терендікті кім берген зейініңе.
Жетім менен жесірге қолын созған
Бақыт нұры төгілсін мейіріңе!..
Достарыңызбен бөлісу: |
