294. Су жалатпақ Ойын ептілікті қажет етеді. Ойыншылар судың өзен көлдің жағасында тұрып, қолдарына өздері таңдап алған дөңгелек және жалпақ келген тастарды су бетіне жалата лақтыру арқылы кімнің тасы су бетінде жалатуды көп орындағандығын санау арқылы жарысады. Бұл ойынға жақсы ептілік қажет.
295. Зырылдауық Зырылдауықты дайындау үшін екіқабатталған, ұзындығы 20-40 см болатындай жіп алынады да жіпке тұйықтамай тұрғанда ортасында 2 тесігі бар үлкендеу түйме немесе соған ұқсас жалпақ келген зат алынып, жіп тесіктерден өткізілгеннен соң тұйықталады. Жіптің арасына екі қолдың алақанын өткізіп, түймені алға немесе артқа қолдың көмегімен жіп шиыршықталатындай қозғалысқа ендіреді. Түйме айналысқа түскен сәттен бастап екі алақанды жайлап екі жаққа қарай тарту және босату арқылы жіптің кері немесе алға қарай шиыршықталуын қамтамасыз етеді, осы кезде жіпке ілінген түйме зырылдауықша алға немесе кері қарай жылдам айланысқа түседі. Түйменің неғұрлым жылдам және ұзақ айналуын қамтамасыз ету ойын шарты болып саналады. Бұл ойынды көбіне уақытты өткізу ермегі ретінде немесе адамның сабырлылығын сақтау үшін пайдаланады.
296. Өгіз жығу Күшін және ептілікті көрсету мақсатында малды ұстау, оны жерге жығу сияқты өнерлерін көрсету мал баққан адамдардың арасында кеңінен тараған. Соның ішінде өгізді мүйізінен ұстап мойнын бұрап жерге жығу, бір жағынан кәсіптік мақсатта қолданылса, екінші жағынан ермек ойыны ретінде де қолданылған. Жығу барысында өгіздің аяғын байлауға болмайды.
297. Қарын тірестіру Бұл ермек ойынды көбіне той-томалақта қызық үшін ойнайды. Ол үшін екі кісіні ортаға шығарып, сыртынан олардың еркін қозғалуларына жететіндей шеңбер сызады. Ойыншылар ортаға шығып, екі қолдарын арттарына ұстаған күйде тек қарындарымен итерісулері арқылы бір-бірін шеңбер сыртына шығарулары ойын шарты болып саналады. Ойыншыларды таңдау кезінде қарындары үлкен, алға салбырап шыққан адамдарды алған қызықты болады.
298. Су астынан зат алу Ойын суы терең келген өзен, көлдерде ойналады. Ойын шарты бойынша арнайы суға жылдам бататын затты алдымен ойыншыларға көрсетіп барып, артынан суға лақтырады. Ойынға қатысушылар сүңгіп барып сол затты судан алып шығулары қажет. Суға лақтырылған заттар бірнешеу болуы да ықтимал. Кім сүңгіп барып затты тауып судан алып шықса немесе кім көп затты тапса сол жеңімпаз болады. Ойынды күрделендіру мақсатында ойыншыларға заттың қай жерге түскенін көрсетпей лақтыруға болады.
