Фельдшер Василий Кургановтың портреті

Әуелі, қысқаша, Курганов туралы: Фельдшер Василий Кургановтың Антон және Андрей деген ұлы болғаны бізге мәлім. Ана жылғы Нұрмағамбет тұтатқан өртте Василий күйген үйінің жалынына ауыр түрде шарпылды да, біраз уақыт больницада жатып, әрең дегенде тәуір болды. Бірақ өрттен түскен тыртықтардан ба, өрт ішінде шошып оянғандықтан жүрегі қатты шайлығудан ба, немесе бұрын да болып жүретін ымшық-шымшығының өрт күйігінен кейін қозуынан ба, күйіктен тұрғаннан кейін бірер жыл сүлеленіп жүрді де дүниеден көзін жұмды. Артында жоғарыда аталған екі бала мен қартаң және сырқат әйелі қалды.