Айт мерекесінің тағылымы мол

Бас мүфтиіміз Ержан қажы Малғажыұлының бастамасымен биылғы жылды дін мен дәстүр жылы деп жариялауына орай діни мерекелерде ұлттық құндылықтарды кеңінен насихаттау мақсат етіледі. Ақмола облысының мұсылмандары биылғы оразаны осы бастама аясында өткізді. Ораза айт мерекесінің алғашқы күні Науан хазрет атындағы Көкшетау орталық мешітінда айт намазы оқылғасын игі шаралармен жалғасын тапты. «Түркістан» дәмханасында зиялы қауым өкілдері мен ораза ұстаған ағайынға арнап айт дастарханы жайылды. Онда уағыздар айтылып, ислам дінінің тағылымы жайлы әңгіме қозғалды.

Жиналғандар алдында облыс имамы сөз сөйлеп, баршаны ұлық мерекемен құттықтады. Қазақстан Республикасы Парламенті Сенатының депутаты, жазушы Жабал Ерғалиев те өзінің жүрек жарды тілегін жеткізді.

Бұл шара әртүрлі мәдени бағдарламаға ұласты. Хадис сөздерге байланысты қазақтың мақал-мәтелдерін айту жарысы ұйымдастырылды. Жүзден жүйрік шыққандар арнайы сыйлықтармен марапатталды.

«Ботай» дәмханасында әлеуметтік аз қорғалған отбасылар мен қараусыз қалған 80 балаға дастархан жайылып, айт шайы берілді. Кішкентай бүлдіршіндерге ислам жайлы сұрақтар қойылып, олардың дін жайлы танымдары мен білімдері ортаға салынды. Оларға концерттік бағдарлама ұсынылып, соңынан сыйлықтар үлестірілді.

Айт мерекесі Көкшетау қаласының іргесіндегі Красный яр мешітінде өзіндік сипатымен айшықталды. Мұнда Дінбасының бастамасы негізге алынып, бұл мерекені көпшілік мәдени-спорттық шараға айналдырды. Алдымен боз кілемде балуандар белдесулері өтті. Қазақ күресінен өткен бұл жарысқа көрші Солтүстік Қазақстан облысының балуандары да келді. Ал, кеше ғана елордада өткен «Қазақстан барысы» жарысына қатысқан Нұрлан Жамалов және Леонид Станеев сынды халықаралық жарыстарда топ жарып жүрген балуандардың боз кілемге шығуы жарыстың абыройын асқақтатты.

Арқан тартыс сайыстары да аса тартысты өтті. Бұл жолы Науан хазрет және Әбікәрімұлы мешіттерінің бас имамдары Қанат Қыдырмин мен Науан Мүтәлұлы бастаған екі команда жарысты бастап берді.

Қазақтың ұлттық дәстүрі әндері де әуелеп, шырқалды. Кенттің орталық алаңына жиналған қауым қасиетті дін мен ұлттық дәстүрдің жарасым тапқанын көріп, шат-шадыман қуанышқа бөленді.