Қайырлы күн, құрметті Қайрат Жұмашұлы және конфренцияға қатысушылар! «Қазіргі заманда жастарға ақпараттық технологиямен байланысты әлемдік стандартқа сай мүдделі жаңа білім беру өте қажет»

Мектеп мұғалімдері модуль материалын меңгеруде жаңашыл педагогикалық әрекеттерді, компьютерлік сауаттылық саласын, ғаламторды, мультимедианы пайдалану, мәтіндер мен электрондық кестелерді өңдеу дағдыларын тәжірибеде игеріп, қолдануды үйренді.

Мұғалім үздіксіз ізденуі, жаңа заман талабына сай жаңаша көзқараста болуы, сонымен қатар өз білімін ақпаратты технологиялармен ұштастыра білуі – мұғалім бойындағы ең негізгі қасиет. Шәкіртіне жан- жақты білім беру үшін жеткілікті білім қоры болуы және білімін үздіксіз жетілдіріп жаңартып отыруы қажет.

Назарбаев зияткерлік мектептері ДББҰ Педагогикалық шеберлік орталығы мен Кембридж университетінің қатысуымен Қазақстан Республикасы жалпы білім беретін мектептері педагогтарының біліктілігін арттыру курстарының бағдарламасының бірінші (ілгері) деңгейін оқып, оны өз тәжірибемде қолданып, мұғалімдік кәсіптің заманауи талаптарға сай жетістіктерін жете түсіне бастадым

Менің жұмысымның мақсаты – әріптестеріме коучинг сабақтары арқылы курс мазмұнын түсіндіріп, сонымен қатар бағдарламаның жеті модулінде көрсетілген жаңа әдіс-тәсілдерді тарату еді.

Коучинг үдерістерін жүйелі жүргізу арқылы мектептің оқу үрдісіне жаңашылдықтар енгізілуде. Коучинг сабақтары жылдың басында мектептің жұмыс жоспарына енгізіліп, әр мұғалімнің білім жетілдіру жоспарын қамтып отыр. Коучинг тақырыптары тәжірибе алмасуға қатысушы мұғалімдердің кері байланыстары арқылы таңдалып өткізіледі. Сындарлы оқытуға негізделген жеті модуль, орта мерзімді жоспар құру және "Lesson Study" үдерісі тақырыптарында өткізіледі. 2014 жылы коучинг сабақтарына жүйелі түрде мектебіміздің 24 мұғалімі қатысты, олардың ішінде 7 мұғалім өз іс-тәжірибелерінде қолданады.

Ұстаздардың іс-тәжірибесін, кәсіби білімін жетілдіруіне көмек көрсету үшін коучингтердің тиімділігі бар. Коучинг сабақтары арқылы мұғалімдерге жаңа әдістерді үйрете отырып, бағыт-бағдар беріп, олардың кәсіби жұмыстарында оқушыларға нақты және жан-жақты білім беруге көңіл бөлінеді.

Өз тәжірибеме келетін болсам, сабақтарымда сыни тұрғысынан ойлау, ақпараттық технология модульдерін жиі қолданамын. Ал мектепте алған білімді оқушылардың қолдана білуін, өмірмен байланыстыра алуын жүзеге асыру көп еңбектенуді қажет етеді. Мектептегі сабақ беру кезінде іс-тәжірибеме өзгерістер енгізу арқылы өзімді де, оқушыларымды да өзгерте алдым. Өзгеріс дегеніміз – жаңа тәсілдерді енгізу. Өз тәжірибеме енгізген жаңа тәсілдің бірі – тренинг. Тренинг оқушы назарын жаңа сабаққа аударуда, қызығушылықтарын арттыруда, ынтымақтастықты қалыптастыруда маңызды тәсіл. Себебі, сыныпта ынтымақтастық атмосферасын орнату мақсатында «Шаттық шеңбері» тренингісін ұйымдастырғанда, оқушылар бір-біріне жақсы тілектер айтып, сыйластық танытады. Топтық жұмыс – бұрын-соңды көп қолданбаған тәсілдерімнің бірі еді. Бұл әдіс, біріншіден, оқушыларға бірігіп жұмыс істеу мүмкіндігін тудырса, екіншіден, ұйымшылдыққа тәрбиелейді, бірін-бірі оқытуға, бірінен-бірі үйренуге жағдай жасайды және көшбасшыны анықтауға мүмкіндік береді.

Сыни тұрғысынан ойлау – креативті тұлғаны қалыптастырудың бір жолы. СТО-ды ойлануды дамыту бағдарламасы – әлемнің түкпір-түкпірінен жиылған білім берушілердің бірлескен еңбегінің нәтижесі. Әрине, сабаққа тиянақты дайындалуға көп уақыт қажет, тапсырмаларды түрлендіріп, сабақты өмірмен байланыстырып, әр сабақ сайын топтарды өзгертіп отыру қажет. Соның нәтижесінде оқушылардың сабаққа және пәнге деген қызығушылығы арта түседі. Әр сабақтың қорытынды кезеңінде оқушылардың жеткен жетістіктерін, кемшіліктерін талдап, түсіндіріп отыру тиімді. Бұл – менің тәжірибемдегі ең басты жаңалық. Әр сабаққа мақсат құрып, күтілетін нәтижені анықтап, олардың сабақ барысында не арқылы бағаланатынын көрсетіп отырамын. Сабақтарымның кіріспе, тұсаукесер, негізгі және қорытынды бөлімдерінде мұғалім және оқушы іс-әрекеттерін толық жазу арқылы сабақ барысында мұғалім – нұсқаушы, оқушы – ізденуші екендігі айқындалды. Сабақтың төрт кезеңінде оқушылардың проблеманы шешу, ақпараттық және коммуникативтік құзіреттіліктерін дамыту мақсатында әртүрлі стратегиялардың қолданылуы тиімді.

Құзырлы оқытудың негізгі идеясы оқушының тақырыпты өз бетімен меңгеруі, түсінуі мен бағалай алуы болып табылады. Сабақтарды осындай әдіс – тәсілдермен өткізу арқылы оқушылар білімді өз бетімен оқып-үйрене алады, өзінің оқуы үшін өзі жауапты екендігін сезінеді, қызығушылықтары оянып, белсенділіктері артады, ой еркіндігі дамиды.