Көбіміз идеалдылыққа ұмтыламыз. Мұның жақсы тұстары да бар. Атқарған қызметін, тазалығы мен түр-әлпетін, сөйлеу мәдениетін өте жақсы қылуға ұмтылатын мұндай адамдар жұмысын мінсіз қыламын деп, алға қарай тынымсыз тырмысып отырады. Мысалға жазып отырған қағазын умаждап қоқыс жәшігіне лақтырып, одан да жақсысын жазам деп қаламын қолына қайта алған жазушыны келтіруге болады. Перфекционизм адамды бір орында тоқтап қалмай, үздіксіз дамуға итеріп отырады. Ал перфекционизмді оң ұшынан түсінбей, идеал болуды тағы да материалдық және сыртқы құндылықтарға әкеп тірер болсақ, перфекционизм ең қорқынышты қасиетке айналмақ. Әсіресе, жаңа технологиялар өрбіп тұрған бүгінгі заманда, жастар арасында бұл көп кездеседі. Өзіне идеал боп көрінген өзге адамға еліктеу мақсатында түрлі оталар жасатып түр келбетін, киім киісін, өзін-өзі ұстау мен сөйлеу мәдениетін өзгертетін адамдар кейде шектен шығып жатады. Бұл бүгінгі таңда өзекті мәселеге айналып отыр.
