ШҮЛЕМБАЕВ ҚАТЫРШАТ ШАПАҒАТҰЛЫ 1937 жылдың 5 наурызында Павлодар облысының Баянауыл өңірінде дүниеге келген. Әкесі Шапағат Ысқақұлы Баянауыл өңіріне белгілі ақын, педагог және ұзақ жылдар бойы мектеп директоры болған азамат еді. Абай атындағы ҚазПИ-дің филология факультетін бітіргеннен кейін философия мамандығы бойынша кандидаттық диссертациясын (1977) және докторлық диссертациясын (1985) Мәскеу қаласында дін философиясы бағытында қорғайды. Ол Ы.Алтынсарин атындағы медальдің және т.б. наградалардың иегері. Ұзақ жылдар бойы Абай атындағы ҚазПИ-дің философия кафедрасының меңгерушісі, тарих факультетінің деканы болды. Бірнеше рет (1972 және 1978 жылдары) дінтану пәні бойынша оқулықтар жазды. Оның еңбектерінде қазақ халқының рухани және мәдени ерекшеліктері философиялық сараптаудан өткізілді. Оның ұйымдастыруымен бірнеше халықаралық конференциялар өтті. Ол Қазақстан Республикасының Әлеуметтік Ғылымдар Академиясының негізін қалаушылардың бірі және оның ғылыми жетекшілігімен 30-дан аса ғылым кандидаттары мен докторлары дайындалды.
