Кардиальдыжәне пилорустық бездердің қабырғасын кілегей бөлетін мукоциттер құрайды. Олардың араларында жекеленген негізгі және париетальды клеткалар кездеседі. Кардиальды бездер сөлі құрамында крахмалды ыдыратын амилоидты ферменттер болады.
Жекеленген эндокринді клеткалар түтікше бездер денелері мен түбінде кездеседі.
Көпбөлімді аралас қарын күйіс қайтаратын жануарларда болады. Ол төрт бөлімнен тұрады. Олар: мес қарын (rumen), жұмыршақ (reticulum), қатпаршақ (omasum) және ұлтабар (abomasum). Алдыңғы үш бөлімнің кілегейлі қабығында без болмайды. Оларды алдыңғы қарындар деп атайды. Бұларда азық механикалық биологиялық өңдеулерден өтеді. Ферменттердің қатысуымен азықты химиялық қорыту процесі ұлтабарда жүреді. Оның кілегейлі қабығында да кардиальды, фундальды және пилорустық безді аймақтар болады. Ащы ішек (тонкая кишка) — intestinum tenue — қарын мен бүйеннің аралығында орналасқан азық қорыту аппаратының ортаңғы бөлімі. Ащы ішек өз кезегінде: он екі елі ішек, аш ішек және мықын ішектен құралады. Азық қорыту аппаратының ортаңғы бөліміне аталмыш ішектерден басқа, өзектері он екі елі ішекке ашылатын ірі ас қорыту бездері бауыр мен ұйқы безі жатады. Он екі елі ішек (двенадцатиперстная кишка)— intestinum duodenum — жануарлардың түрлеріне байланысты ұзындығы 40 см -120 см дейінгі, қысқа шажырқайға ілінген ащы ішектің қарыннан басталар бөлігі. Аш ішек (тощая кишка) — intestinum jejunum — ащы ішектің ең ұзын бөлігі (сиырда — 40 м, қойда — 30-35 м, жылқыда — 30 м, шошқада — 20 м, итте — 2-7 м). Ол ұзын шажырқайға ілініп, көптеген аш ішек ілмектерін (ansae intestinalis) түзеді. Ол он екі елі ішекті мықын ішекпен жалғастырады.
