Ойынға қатысатын балалар шеңбер құрайды. Санамақтың көмегімен «Соқыртекені» таңдап алады. Шеңбердегі балалар көзі байланған ойыншыға кезекпен жақындап, қолының ұшын тигізеді. «Соқыртеке» оның кім екенін тауып, атын атауы тиіс.
Өзінің кім екенін білдіріп қойған баланың көзін байлайды.
«Қасқырға арналған қақпан»
Ойынға қатысатын балалар екі командаға бөлінеді. Бір команда қасқырға қақпан құрады – қол ұстасып, шеңбер құрап тұрады. Екінші команда қасқырлардың рөлін атқарады – залды айналып (қақпан арқылы) төрт аяқтап еңбектейді. Тақпақ айтады: «Кәне, кәне, халайық, Қасқыр қақпан құрайық.
Кәне қақпан берік бол,
Қасқыр, қасқыр, келіп көр»! – тақпақ аяқталғаннан кейін бірінші командадағы балалар қолдарын түсіріп, отыра қалады. Қақпан жабылды. Қақпанның ішінде қалған қасқырлар ойыннан шығады. Қалған балалар ойынды жалғастырады. Кейін командалар орын алмасады.
