Жоспарланған қосымша өнімге арналған минералдық тыңайтқыштар мөлшерін есептеу

Бұл әдіспен тыңайтқыш мөлшерін алғаш рет 1964 жылы мазмұндаған Ресей оқымыстысы Д.В.Федоровский болды. Оның ойынша жоспарланған қосымша өнімге арналған минералдық тыңайтқыш мөлшері топырақклимат жағдайына сәйкес ғылыми жағынан дәлелденуі тиіс. Сондықтан автор соңғы 3-4 жыл бойы тыңайтқыш берілмеген танаптағы дақылдың өнімінің орташа мәнін пайдаланған. Ал жоспарланған қосымша өнімге тиісті тыңайтқыш мөлшерін белгілеу үшін автор өніммен кететін қоректік заттардың шамасын және минералдық тыңайтқыш құрамындағы қоректік элементтерді өсімдіктің бірінші жылы пайдалану коэффициентін негізге алған. Есептеу арқылы шығарылған минералдық тыңайтқыш мөлшеріне топырақтың қоректік элементтердің жылжымалы түрлерімен қамтамасыз етілу деңгейіне сәйкес түзету енгізеді (50-кесте). А.Т.Пономарева (1968 ж.) пікірінше Қазақстанның оңтүстік аймағының топырақ-климат жағдайында өніммен кеткен калийдің 30%-ы мен фосфордың 100%-ын тыңайтқыш түрінде топыраққа енгізу барлық ауыл шаруашылығы дақылдарынан мол өнім алуды қамтамасыз етеді.