Хореография кафедрасының шығармашылық жолы г. Р. Ділдебаева, п.ғ.қ., аға оқытушы М.Әуезов атындағы ОҚМУ, Шымкент, Қазақстан

1985 жылдан бастап Әл-Фараби атындағы Шымкент педагогикалық мәдениет институтының «Мәдени ағарту жұмыстарының теориясы мен тарихы» кафедрасының құрамында Қазақстан бойынша алғаш рет «Хореография» мамандандыруға талапкерлер қабылданды.

1989 жылдың қараша айында мамандық өз алдына кафедра болып шығып институт бөлімінің біріне айналды. Алғашқы меңгерушісі қызметіне кафедраның негізін қалаушы философия ғылымдарының докторы, профессор, ҚР мәдениет қайраткері және білім үздігі, 2013 жылдың ҚР үздік оқытушысы Сералы Шабаевич Тлеубаев тағайындалды.

2000-2003 жылдары кафедраның меңгерушісі қызметін п.ғ.к., Республикалық және халықаралық байқаулардың лауреаты З.Б. Әжібекова атқарған.

2003 жылдан қазіргі уақытта кафедраның меңгерушісі қызметін п.ғ.к., доцент, Республикалық және халықаралық байқаулардың лауреаты Б.С. Тлеубаева атқаруда.

Кафедра 5В040900 - «Хореография» мамандығы бойынша, хореография педагогы біліктілігіне ие болатын бакалавр мамандарды дайындайды.

Біздің түлектер Қазақстанның әр облысында, жақын және алыс шет елдерінде мамандығы бойынша қызмет атқаруда. Кафедра ұжымының басты міндеті мен бағыты оқу-әдістемелік және шығармашылық жұмыстарының сапалығын арттыру.

Хореография мамандығын бітірген түлектер арнайы мектептерде, колледждерде педагог-хореограф ретінде, хореографиялық ұжымның жетекшісі, балетмейстер ретінде, би театрларында, Мемлекеттік би ансамбльдерінде әртіс ретінде қызмет атқарады.

Облыстық опера және балет театрының ашылуы – қала тарихындағы үлкен оқиға. Театры өзінің алғашқы маусымын Д.Вердидің «Травиата» операсының алғашқы қойылымымен ашты және бұл Ұлы италияндық композиторды еске алу ғана емес, сонымен қатар, оның шығармасына және жалпы операға деген жаңа көзқарастың өзіндік әрекеті.

Верди көптеген көрермендерге операның кейіптеушісі болып табылады. Композитор өзінің шығармасымен XIX ғасырдың италия операсының биік шыңына жетті. Атақты балетмейстер Б.С.Тлеубаеваның қойған билері операда ерекше орынға ие болды. Оған «Хореография» кафедрасының перспективті оқытушылары мен студенттері де ат салысты. Актерлік шеберлік жинаған, талантты бишілер С.Мырзаев және Қ.Бимурзаева орындаған «Сыған» және «Испан» матадорлары операның негізгі би сахнасы болып табылады. Олардың орындауында осы халықтың биіне деген құштарлық пен жігерлік, адал сезім көрініп тұрды. Балетмейстер психологиялық музыкалы драманың дамуын, қаһармандардың күйзелісін және сезімін қимылмен ашық көрсетуге тырысты. Опералық спектакльдегі таза би сахнасында балетмейстер тек қана балет артистерімен шектелмейді, сонымен қатар, опера солистеріне және хор артистеріне аса назар аударуға міндетті. Балетмейстер режиссер-қоюшының опера спектаклінің иілгіштік жағынан кейіптендіруіне көмектесу керек.

Сондай-ақ «Қазақстанда француз мәдениеті апталығы» күніне орай хореография кафедрасында әлемдік деңгейдегі биші хореограф Жан-Клодом Вуайаком және биші Бернаром Вуайакоммен жаңа үлгідегі «хип-хоп» стилінде мастер-класс өткізді. Олармен біздің студенттер ағылшын және француз тілдерінде сөйлесіп, қарым-қатынас жасасты. 

«Қаракөз» би ансамблінің көркемдік жетекшісі, әрі бас балетмейстері – Балжан Сейдраманқызы Тілеубаева бірнеше байқауларда балетмейстерлік жұмысы үшін арнайы сыйлықтарға ие болған оның ішіндегі ең күрделі сый, II - Республикалық Шара Жиенқұлова атындағы қазақ биі байқауында Қазақстан Республикасының халық әртісі, өнертанушы профессор, халықаралық ақпараттандыру академиясының академигі, тәуелсіз «Тарлан» сыйлығы мен Мемлекеттік сыйлықтың иегері, әлемге әйгілі хореография мэтрі Болат Аюханов байқаудың төреағасы ретінде Тлеубаеваның алдында тізе бүгіп «қойылған би композициясының философиясы үшін» деп К.Күмісбеков сазына қойылған «Отырар бейнелері» атты қойылым үшін 1-орын жүлдесін тапсырған кезде, көрермендер ду шапалақ ұрды. Ол біздің ұжым үшін үлкен мақтаныш. Ансамбль балетмейстерлері – аға оқытушылар Санжар Алтынбекұлы Мырзаев, Гүлмира Рахымжанқызы Ділдебаева, Азиза Азатбековна Турдиевалар үлкен үлес қосуда.

2010 жылы тағы да осы елшіліктің шақыруымен «Наурыз» мерекесін тойлауға, қазақ халқының дәстүрімен таныстыруға Мәскеу қаласында өткен концерттік бағдарламаға қатысты. Концерттер Москва облысы Зеленоград қаласының мәдениет сарайы мен Москва қаласындағы музықалық үйінде өтті.

ОҚО 80 жылдық мерей тойына арналған «Нұрын шашқан – Оңтүстік» салтанатты іс –шарасына белсене қатысқандары үшін облыс әкімінің мақтау қағазымен марапатталды.

«Таңшолпан» хореографиялық би байқауына қатысып, I орынды иеленгендері үшін «Қаракөз» би ансамблі марапатталды.

«Қаракөз» би ансамблінің лауреаттары мен жүлделі жеңімпаздары Халықаралық және республикалық жастар шығармашылық фестивальдар, барлық байқаулар мен мерекелік іс-шаралар мен Түркістан қаласында өткен Дүниежүзілік Құрылтайда өз өнерлерімен университетті жақсы қырынан көрсетті, алдағы уақытта да жақсы жағынан таныла беретіні сөзсіз.       

Биыл белгілі ғалым, білікті басшы Жұмахан Мірхалықов басқаратын оқу орнындағы қазақ би өнерінің дамуына үлес қосып келе жатқан хореография кафедрасының 30 жылдық мерей тойы өтпек. Әр түрлі би жанрының мамандарын даярлайтын ұстаздар мен басшылықтың мерей тойға деген жоспарлары ауқымды.

1 «Искусство, рожденное народом»/ Өмір – айна №17 (101) 30.04.2008

2 «Бұраңбелдер отауы» /Рейтинг №6 (306)

19 ақпан 2015 жыл