Халықаралық хром өндірісі қауымдастығы мүшелерінің жыл сайынғы кездесуі шеңберінде Ақтөбедегі Еуразиялық Топтың (ERG) құрамындағы «Қазхром «ТҰК» АҚ жаңа ферроқорытпа зауытына (4 цех) 62 компания өкілдерінен тұратын делегация келді. Қонақтар Ақтөбе ферроқорытпа зауытының ферроқорытпа өндірісіндегі әлемдік жоғары технологиялық инновацияларды енгізу жұмыстарымен танысты.
Еңбекті қорғау және қауіпсіздік техникасы бойынша нұсқаулықтан өткеннен кейін делегация №4 балқыту цехы мен дайын өнім цехында болып, оның бүгінгі тыныс-тіршілігімен танысты. Шетелдік компания өкілдері жаңа зауыт шығаратын әртүрлі хром фракцияларын көріп, тіпті қолмен ұстап көруге мүмкіндік алды. Шетелдік қонақтарды өндіріс көлемі, техникалық базасы, технологияларды енгізу сияқты мәселелер қызықтырды.
– Біздің халықаралық хром өндірісі қауымдастығы, осындай техникалық тур ұйымдастырғанына және 2017 жылдың конференциясына демеушілік жасағаны үшін ERG өте ризамыз. Соңғы рет біз мұнда 2010 жылы болған едік, онда құрылыс жұмыстары енді ғана басталып жатқан болатын. Былтырғы жылы 30 адам, бүгін бірінші рет 60 адам келіп отырмыз. Бұл өте керемет. Бұл жерде еңбекті қорғау және қауіпсіздік жақсы ұйымдастырылған, тіпті бізге жеке қорғаныс құралдары да берілді, айнала тап-таза. Бұның бәрі бізді өте қызықтырады, – деді халықаралық хром өндірісі қауымдастығының (ICDA) хатшысы Филипп Ришар.
Бірнеше жыл «Қазхром» компаниясымен тығыз жұмыс істесек те бірінші рет Кәсіпорынға келіп отырмыз. Төртінші цех өзінің стандарттарымен және заманауилығымен қызықтырды, – деп атап өтті швейцариялық Telf AG компанияның өкілі Иван Руденко.
– Бұл өте жоғарғы технология, керемет жұмыс істейтін таза зауыт. Мен де Үндістанда металлургиялық зауытта жұмыс істеймін, бірақ ол мұндай үлкен емес. Мен және менің компаниям үшін осындай өндірісте болу – жақсы тәжірибе. Мен өзім және өзімнің жұмысым үшін көптеген пайдалы мәліметтерді алдым, – деді Surya Alloy Industries Ltd компаниясынан келген Ашиш Рунда.
