Информатиканың іргелі негіздері

Практикада алгоритмдерді орындаушы ретінде арнайы автоматтар — компьютерлер қолданылады. Сондықтан, компьютерде орындауға арналған алгоритмдер оған түсінікті тілде жазылуы тиіс. Алгоритмді жазу тілі бұйрықтарды (командаларды) талқылаусыз дәл беруі тиіс. Мұндай тіл - бағдарламалау тілі, ал осы тілде алгортимнің жазылуы —компьютерге арналған бағдарлама деп аталады.

Кез келген алгоритмнің логикалық құрылымы үш базалық құрылым комбинациясы түрінде берілуі мүмкін: 
тізбектік, тармақталу, цикл. Базалық құрылымдардың негізгі ерекшеліктері - оларда бір ғана кіру мен шығудың болуы. Алгоритмдерді жеке базалық (яғни, негізгі) элементтерден құралған құрылым ретінде беруге болады. Сондықтан алгоритмдерді құрастыру ұстанымдарын зерттеуді осы базалық элементтерді қарастырудан бастау қажет. 

"Тізбектік" базалық құрылымы. Бірінен соң бірі жалғасып отыратын әрекеттер тізбегінен құрылады. 

"Тармақталу" базалық құрылымы. Шартты тексеру нәтижесіне (иә немесе жоқ) байланысты алгоритм жұмысының альтернативті жолдарының бірін таңдауды қамтамасыз етеді. Жолдардың әрқайсысы ортақ шығуға әкеледі, сондықтан алгоритм жұмысы қандай жолдың таңдалуына қарамастан ары қарай жалғаса береді. Тармақталу құрылымы төрт негізгі нұсқалардан тұрады: егер - онда; егер – онда - әйтпесе; таңдау; таңдау - әйтпесе. 

"Цикл" базалық құрылымы. Цикл денесі деп аталатын кейбір әрекеттер жиынтығыныңбірнеше мәрте орындалуын қамтамасыз етеді.

Күрделі есептер үшін алгоритм құру кезінде декомпозициялар (жоғарыдан төменге қарай жобалау) және синтездің (төменнен жоғарыға қарай жобалау) қатысуымен жүйелік бағыт қолданылады. Күрделі жүйе құрылымын құру кезінде де, алгоритмді қалыптастыру кезінде де дедуктивті және индуктивті әдістер қолданылады. Алгоритмдерді құрудың көптеген әдістері бар, бірақ келесі негізгілерді атап өту қажет: жеке мақсаттар әдісі (декомпозициялар); өрлеу әдістері; шекара және тармақ әдістері; кері өңдеу әдістері; мәліметтер құрылымына негізделген әдістер, динамикалық бағдарламалау және т.б. әдістер.