Нақты құнын анықтау схемасы 1-суретте көрсетілген. Қорларды ағымдағы жай - күйіне және орналасқан жеріне жеткізу кезінде жұмсалған шығындар: қорларды сатып алуға арналған шығындар, оларды сақтау орнына жеткізуге және тиісті Жай – күйге келтіруге байланысты көліктік-дайындау шығыстары. Тауар-материалдық қорларды сатып алуға жұмсалатын шығындар сатып алу бағасын; әкелуге арналған баждарды; жабдықтау, делдалдық ұйымдарға төленген комиссиялық сыйақыларды: қорларды сатып алуға тікелей байланысты көлік – дайындау және өзге де шығыстарды қамтиды. Сауда жеңілдіктері, артық төлемді қайтару және басқа да осындай түзетулер сатып алу шығындарын анықтау кезінде шегеріледі. Тауар-материалдық қорларды қайта өңдеуге (жұмыстарды, көрсетілетін қызметтерді орындауға) арналған шығындар өндіріс процесінде пайдаланылатын табиғи ресурстардың, шикізаттың, материалдардың, отынның, энергияның, еңбек ресурстарының құнын, негізгі құралдардың амортизациясын, сондай-ақ өндіріс технологиясымен және оны ұйымдастырумен негізделген өнім өндіру бірліктерімен тікелей байланысты басқа да шығындарды қамтиды және өнімнің өндірістік өзіндік құны ретінде танылады.
