Ешкіемертектестер (тентекқұстар) отряды. Бұл отрядқа дене тұрқы орташа түнде тіршілік етіп, жәндіктермен қоректенетін құстар жатады. Аузы үлкен, тұмсығы өте кіші, қауырсындары ұзын әрі үшкір. Кеңінен тараған түрі – кәдімгі ешкіемер, бақаауыз – Оңтүстік Азияда, гуахаро – Оңтүстік Америкада таралған.
Ұзынқанаттектестер отряды. Сыртқы түрі қарлығаштарға ұқсас, өте жылдам ұшады. Қорегін (жәндіктерді) ұшып жүріп ұстайды. Аяқтары өте қысқа, төрт саусағы да алға қарай орналасқан, жерде жүре алмайды. Тұмсығы шағын, аузы үлкен. 360-тай түрі 2 отряд тармағына бөлінеді: а) ұзынқанаттар (60 түрі бар) ә) колибрилер (300-дей түрі бар). Ұзынқанаттардың кеңінен таралған түрлері – кәдімгі ұзынқанат. саланган және т.б. Колибрилер – дене тұрқы өте кіші (салмағы 1,6 г. 20 граммға дейін) құстар. Жылдам ұшады, әрі қанаттарын өте жылдам қағады.
Ормандарда, бұталар арасында кездеседі. Көбіне өсімдік гүлдерінің шырындарымен (нектармен) қоректенеді. Тұмсықтары ұзын әрі сәл иілген. Олар Оңтүстік және Солтүстік Америкада кең таралған.
