242. «Салт аттылар» Ойын алаңда немесе үлкен бөлмеде өтеді. Ойнаушылар екі топқа бөлініп, жұптасып тұрады. Ойынға тек қана ұлдар қатысады.
Ереже бойынша, әрбір жұптағының біреуі екіншісінің мойына мініп отырады. Екі “салт аттылар” тобы құрылады. Ойын шарты бойынша жоғарыдағы “салт аттылар” бір-бірін “ат” үстінен құлатулары керек. Жүргізушінің белгісі бойынша ойынды бастайды. Екі құрамадан ортаға екі “салт аттылар” шығады. Қай топтың “салт аттылары” көп құламаса, сол топ жеңген болып саналады. Ойынға екі топтың барлық "салт аттыларын” бірден қосуға да болады. Ойын аяғында жүргізуші жеңімпаздарды атайды және алдын ала дайындалған жүлделерді таратады.
243. Көтермек Балалар екі топқа бөлініп, шеңбер жасап тұрады. Өз еркімен күшімді сынаймын, сайысамын деген екі бала ортаға шығады. Ойын мақсаты, екеуі бір-біріне қарама-қарсы тұрып білектерінен ұстап немесе белдерінен қапсыра ұстасып бір-бірін жерден көтеріп алу. Ойын күш қабілетін дамытады.
244. «Қазан» Алаңға 5, 10, 15 және 20 метр сайын түзу сызық бойымен диаметрі 20 см келетін шұңқырлар қазылады. Әр ойыншыға 4 тас немесе доп беріледі. Ойнаушылар тұрған сызығынан кезекпен тастарды немесе кішкене доптарды шұңқырларға жермен домалатып түсірулері қажет. Әр шұңқырға бір доптан түсуі қажет, түскен шұңқырдың ретіне қарай ұпай беріледі. Бір шұңқырға екі доп түсіп кетсе, сол шұңқырдағы ұпайлар "жанып" кетеді. Кім көп ұпай жинайды, сол жеңімпаз атанады.
245. «Шұңқырдан теңге алу» Ойынға қатынасушылар тең екі топқа бөлінеді, әрқайсысы жеке-жеке шыбық «атқа» мінеді. Ойынды бастаушы жүргізеді.
Ойын кезегі басталатын жерге сызық сызылады. Одан әрі 20—30 метрдей жерден тереңдігі бір қарыстай екі шұңқыр қазылады. Шұңқырға он-оннан тас салынады. Екі топтан екі сайыскер шығып сөре сызығына келіп қатарласып тұрады. Бастаушының белгісі бойынша сайыскерлер шыбық аттарымен құйғытып тас салынған шұңқырға қарай шаба жөнеледі. Жүгірген беттерімен шұңқырға жетіп, қолдарымен шұңқырдағы тасты іліп алып, әрі қарай жылдамдықтарын тежемеген күйде өтіп, көмбе сызығына жетеді. Шұңқыр тұсында бөгелуге болмайды.
Ұпай әр сайыскердің іліп алған тастарының санына қарай және өткен уақытына қарай есептеледі. Қай топ көп ұпай жинаса, сол топ жеңеді.
