Мұғалімге қойылатынкәсіби талаптардың жиынтығы педагогикалық қызметке кәсіби дайындық терминімен енгізілген. Оның құрамында, бір жағынан, психологиялық, психологиялық-физиологиялық және дене дайындығын, екінші жағынан, ғылыми-теориялық және практикалық қабілеттілігін ажыратады.
Сегізінші тақырып. Педагогтың кәсіби қабілеттілігі.
Жеке адамның дербес ерекшеліктерінің бірі – бейімділік. Адамдағы белгілі бір бейімділік оның қабілеттілігіне байланысты. Жеке адамның белгілі іс-әрекет нәтижесін танытатын психикалық қасиетті қабілет деп атайды. Қабілеттің дамуы нышанға байланысты. Нышан – бұл жүйке жүйесіндегі анатомиялық-физиологиялық ерекшеліктер. Қабілет нақты іс-әрекет барысында дамиды. Іс-әрекеттің нәтижелі болуы өзара байланысты, бірін-бірі толықтыра түсетін бірнеше қабілетке байланысты.
Қабілеттілік –бұл тұлғаның жеке мүмкіншіліктері, оның квалификациясы (білімі, тәжірибесі). Ол белгілі мәселе бойынша шешім қабылдауға жол ашады.
Педагогтың кәсіби қабілеттілігі ұғымы мұғалімнің, тәрбиешенің жеке ерекшеліктері, олардың көмегімен педагогикалық міндеттер нәтижелі шешіміні табуы тиіс. Ол үшін мұғалім педагогикалық теорияны және оны практикада қолдана білуі тиіс. Осылайша, мұғалімнің педагогикалық қабілеттілігі – педагогикалық қызметті жүзеге асырудағы оның теориялық және практикалық дайындығының бірлігі.
Кәсіби қабілеттілік құрылымы педагогтың педагогикалық іскерлігі негізінде ұсынылады. Педагогикалық іскерлік – теориялық білімге негізделген және педагогикалық міндеттерді шешуге бағытталған, бір бөлігі автоматтандырылған (дағды), бірізділікпен жүретін іс-әрекеттердің жиынтығы.
