Жаттығудың барысы: Психолог бір-бірімен қол алысып амандасуға ұсыныс береді, бірақ ерекше түрде болуын қалайды.Екі қолмен екі бірдей қатысушымен бір мезгілде амандасады, яғни қол жұмыссыз болмауы керек. Үшінші біреу амандасқысы келгенше қолды босатпайды және бұл іс-әрекеттерді үн-түнсіз жасау керек. Тапсырма –осылайша топ мүшелерінің бәрімен амандасып шығу керек. Ойын барысында ешкім де сөйлемейді.
Жаттығу «Шариктер»
Мақсаты: топтастыру, қатысушылардың арасындағы кеңістіктік кедергілерді жою.
Жаттығудың барысы. Қатысушылар үш-үштен топтасып мынадай тапсырма алады: үш ауа шарын алып тез үрлеу керек, одан кейін өзара араларына қойып қатты қысу арқылы тез жару міндеті қойылады. Шарды жарған кезде өткір заттарды немесе тырнақтарын, киім бөлшектерін қолдануға болмайды.
Жаттығу «Пингвиндер»
Мақсаты: Ұжымдық топтасу
Жаттығудың барысы: Пингвиндер топтасып өмір сүреді, қыстың қатты суықтары мен борандарында бір жерге ұйлығып, бірін-бірі қорғаштау арқылы жан сақтайды. Сол ұйлыққан топтың ортасы әрқашанда жылы, ал шет жақтары салқын болады, бірақ табиғаттың қатал мінезін бәрі аман-есен көтеріп шығады. Олар мұны қалай істейді? Сіздер қазір пингвиндердің тобы боласыздар. Сіздердің міндеттеріңіз суықтан үсіп қалмау. «Басталды» деген белгі берілген кезде бәрі бөлменің ішінде қыдырып жүреді де, «Боран» белгісі берілген кезде ұйлығып бір топқа жинала қояды.
Кеңес: Сыртқы шеңберде тұрған пингвиндер тоңа бастағанда ортаға қарай ұмтылады да, іште тұрғандар сыртқа қарай қозғалып, ауысып отырады.
