Бұқаны жекелеп қосу. Алдағы айтылған тәсілден артығырақ. Шаруашылықтарда бұқаны табыннан бөлек ұстайды. Жеке меншіктегі күйлеген сиырға алдын ала бекітілген бұқаны қосып, арнайы кітапқа тіркейді. Бұл тәсіл кезінде асыл тұқым мал өсіретін шаруашылықтарында аса сүтті сиырларға жеке жұптастыру мақсатымен арнайы жоспар бойынша қолданылып жүрді.
Қолда ұсталатын сиырларды ұрықтандыру үшін оларды шаруашылықтың шағылыс пунктіне апарып, оны арнайы станокқа кіргізіп (сиыр мертікпес үшін) бұқаны қосады. Қайталап қосу 12—16 сағат өткенде ғана тиімді. Бұқаны сиырға жекелеп қосудың артықшылығына: бұқаны пайдалану уақытының ұзара түсетіндігі, алынған бұзаудың ата-тегінің қандай тұқымға жататындығын білуге болатындығы, сиырдың бұзаулау мерзімін болжауға болатындығы жатады. Бұл тәсілді қолданғанда азбан бұқа жылына 150—200 сиырды ұрықтандыра алады.
