Сөж тақырыбы: Коммуникациядағы мінез-құлық моделдерін талдау негізінде

Коммуникациядағы ұйымдық мінез-құлық.

Осы тарауды меңгере бастаған сәттен сіз «Ұйымдық мінез-құлық дегеніміз не және оның мен үшін маңызы бар ма?» деп таңданыс білдіруіңіз мүмкін. Ұйымдық мінез-құлықтың анықтамасы туралы кейінірек сөз қозғайтынымыз сөзсіз, алайда, алдымен, ұйымдық мінез-құлықтың маңызы қандай, оны игеру бізге қаншалықты керек екеніне тоқтала кетуді жөн көрдік.

Біріншіден, тарихқа аздап көз жүгіртейік. 1980 жылдардың аяғына дейін бизнес мектептерінің оқу бағдарламаларында менеджменттің техникалық аспектілеріне басымдық беріліп, экономика, есеп, қаржы және сандық әдістерге ерекше назар аударылды. Адам мінез-құлқы мен адам дағдылары туралы курстық жұмысқа аз көңіл бөлінді. Алайда уақыт өте келе бизнес мектептері менеджер жұмысының тиімділігін анықтаудағы тұлғааралық қатынас дағдыларының маңызды рөлін түсінді. 20 өндіріс орнындағы екі мың бір жүзден астам қаржы директоры арасында жүргізілген сауалнама нәтижесі тұлғааралық қатынас дағдысы тапшылығы кейбір қызметкерлердің ілгері жылжуына кедергі болып отырғанын көрсетті.

Ұйымдық мінез-құлық пәнінің басты артықшылығының бірі –оны тұлғааралық қатынас дағдыларын жақсартуға қолдануға болатындығы. Менеджерлердің бойындағы тұлғааралық қатынас дағдыларын дамыту ұйымға жұмыс өнімділігі жоғары қызметкер тартуға көмектеседі. Бұл – маңызды нәрсе, себебі қазіргі заманда жоғары білікті маман табу қиын, әрі олардың еңбек нарығындағы құны қымбат. Бірақ мәселе ұйымдық мінез-құлық маңызын арттыратын тек тұлғааралық қатынас дағдысын дамыту ғана болмауға тиіс. Екіншіден, ұйымдастыру тұрғысынан алсақ, ұйымдық мінез-құлық принциптерін,енгізу жұмыс орнындағы жағдайды жақсы деңгейден өте жақсы деңгейге дейін көтере алады, бұл жайында кейінірек толығырақ айтамыз. Жақсы жұмыс орны ретінде танылған Telefónica Adobe Systems, Cisco, McKinsey & Company, Procter & Gamble, Facebook және Southwest Airlines сияқты компаниялар қаржылық көрсеткіштерін еселеп арттырғаны мәлім.

 Үшіншіден, жұмыс орнындағы қарым-қатынас сапасы мен қызметкерлердің жұмысқа қанағаттануы, стресс және жұмыстан кету арасында тығыз байланыс бар. Мысалы, жүздеген жұмыс орны мен екі жүз мыңнан астам адамға жүргізілген ауқымды сауалнама нәтижелері жалпы жұмысқа қанағаттану әріптестер мен басшылар арасындағы әлеуметтік қатынастарға тәуелді екенін көрсетті. Сондай-ақ жұмыстағы стрестің төмен болуы мен жұмыстан кету ниетінің азаюы да жағымды әлеуметтік қатынастармен байланысты екені анықталды. Тағы бір зерттеу менеджерлерін қолдап, олармен жақсы тіл табысатын және әрдайым көмектесуге дайын тұратын қызметкерлердің идеялары көбінесе жылы қабылданатынын, осылайша олар жұмысқа қанағаттанатынын көрсетеді.Төртіншіден, ұйымдарда ұйымдық мінез-құлық сипатын тарату әлеуметтік жауапкершілікті жете түсінуді кеңейте алады. Мәселен, университеттер болашақ менеджерлерге өз ұйымдарындағы әлеуметтік мәселелерді дұрыс шешуді үйрету үшін әлеуметтік-кәсіпкерлік білімді оқу жоспарларына енгізе бастады. Мұның маңызы аса зор, себебі корпоративтік әлеуметтік жауапкершіліктің мүмкіндіктері мен нәтижелерін түсіну қажеттілігі артып келеді. Біз корпоративтік әлеуметтік жауапкершілікті 2-тарауда кеңінен талқылаймыз.

Бүгінгідей бәсеке мен қойылатын талап жоғары жұмыс орнында менеджерлер өз техникалық дағдыларына ғана сеніп табысқа жете алмайтыны баршамызға белгілі.