Талдықорған қаласындағы нзм-нің 12-сынып оқушысының қазақ әдебиеті пәнінен сыни талдау жұмысы Ермекбаева Зере 12е-сынып Оралхан Бөкей өзінің «Апамның астауы» және «Тортай мінер ақ боз ат» әңгімелерінен қандай әсер тудырды?

Әңгіменің қисынды құрылымынан болар, алдымен оқырман ауыл өмірінің қайнаған ортасына түседі. Ауыл табиғаты, ауыл еңбегі, ондағы балалар өмірін өз басынан өткергендей болады. Кейіпкерлердің мінезінен, рухани әлемінен, мақсатынан оқырман өзіне жақындық іздейді, эмоцияға беріледі.

Автор екі әңгімеде де «үйіміздің айналасы шулаған балалардың базарына айналатын», «апаммен қонаққа барғанда, барлық жылы-жұмсақ менің аузыма тиетін», «туысқандарының үйін сағалап жүретін» деген есімше тұлғалы етістіктерді жиі қолданады. Өткен шақта тұрған бұл етістіктер автордың алыста қалған ауылына деген ерекше сағынышын, махаббатын, сезімін оқырманға дәл береді. Біз де осы ауылды тамсана сағынғандай боламыз.

Екіншіден, оқырманда кейіпкерлерге деген жылы, жағымды көзқарас қалыптасады, өйткені автордың кейіпкерлері - қарапайым, еңбекқор, мейірімді, адамгершілігі мол, әңгімешіл, арманшыл, артық мінездері жоқ адамдар. Оған біз әр эпизодта көз жеткіземіз. Бірінші әңгімеде «бүкіл ауыл балаларының анасы сықылды Апам», «кез-келген ер-азаматтың ісін атқарар Апам» болса, екінші әңгімеде «бұзау бағып жүрген бала Тортай», «таңнан кешке дейін бас алмай кітап оқитын Тортай»,«Бір жетім бала болыпты,- деп әңгіме бастайтын Тортай», «жазушы болғым келеді» деп армандағыш Тортайды» көреміз.