Абай Құнанбайұлы (1845-1904) – ұлы ақын, жазушы, қоғам қайраткері, ағартушы, қазақ жазба әдебиеті мен әдеби тілінің негізін қалаушы. Абай халықтың таным көкжиегін кеңейтуге ықпал ету үшін шығыс және батыс мәдениеттерін жан-жақты зерттеп, олардың үздік үлгілерімен таныстырып отырды.
Ұлы Абайдың Қара сөздері – педагогикалық (тәрбиелік) тұжырымдар, олар қазақ ұлттық педагогикасына қағба-бағдар ретінде енді. Абай өлеңдері еңбекке, ғылымды сүюге, өнерге, адамгершілікке тәрбиелейді. Абай тұлғасы – отандық мәдениет пен әдебиетте салмақты орын алады.
Төменде ұсынылып отырған, оқырмандардың кең ауқымын ұлы ақынның шығармашылық мұрасымен таныстыруға бағытталған көрсеткіште Әл-Фараби кітапханасының қорында сақталған Абай шығармалары және ол туралы кітаптар берілген.
Көрсеткішке Абайдың 1939-1940 жылдар аралығында латын графикасында басылған жұмыстары енгізілген.
Абайдың шығармалары көптеген өзге тілдерге аударылып, әлем халықтарының жоғары бағасына ие болды. Библиографияда ақынның Қара сөздерінің орыс, ағылшын, тәжік, қытай, неміс тілдеріне аудармалары, сондай-ақ түрік тіліндегі таңдамалы шығармалары, араб тіліндегі өлеңдері қамтылған.
Жұмыстар хронологиялық тәртіппен, шығарылым жылына сай алфавиттік ретпен орналастырылған. Әдебиеттер алдымен қазақ тілінде, содан кейін орыс және шет тілдерінде ұсынылады.
Абай Құнанбаев. Жаздым үлгі жастарға бермек үшін [Текст]: монография / құраст. М. А. Балақаев. – Алматы: Қазбірмембас., 1945. – 62,[2] б. Абайдың тұлға болып қалыптасу жолы баяндалған.
Оқу
Абай Құнанбаев. Шығармаларының толық жинағы / Абай (Ибраһим) Құнанбай. – Алматы : Қазбірмембас., 1945. – 503 б. Қазақтың әдеби тілі мен жаңа әдебиетінің негізін салған ұлы ақын – Абай (Ибраһим) Құнанбаев шығармаларының осы жинағы ақынның туғанына 100 жыл толу мерекесіне арналып шығарылды.
