Байланысты: "Жетістікке бағыттау" сыныптан тыс тәрбие сағаты
Педагог-психолог: Бекетаева Самал Камбарқызы
Мақсаты: Ұстаздардың өз-өзіне деген сенімін күшейту,
оптимистік сезімді арттыру,
эмоциялық күйзелісін түсіру,
мақсатқа жетуге талпындыру,
жетістікке бағдарлау.
Адам баласы өмірде жемісті ғұмыр кешуді, әрі бақытты болуды армандайтыны шындық. Оқуға түссем, табысты жұмыс жасасам, аңсаған арманыма жетсем деп тілейді. Алға қойылған мақсаттарының орындалуын көксейді. Ал осы үшін әрекет жасайды, тірлік қылады. Дегенмен әркім әрқашан діттеген жерінен шыға алмайды, көксегені де орындала бермейді. Содан барып кейбіреулер тағдырға шағынады. Тіпті жолым байланып қалған деушілер де көптеп кездесіп жатады. Осындай көзқарастар илеуінде кетіп, алға мақсат қоймай ғұмыр кешетіндер де баршылық. Шынымен де адам тағдыр жолымен жүреді, бірақ та тағдырды ағыс бойымен жүзіп жатқан кеме ретінде санасақ, ішіндегі адам кеменің сол жаққа немесе оң жаққа бұрылатынын таңдап, қадағалай алады. Сонымен, адам таңдау жасай алады, жетістікке жете алады. Ал жетістікке жету үшін оның не екенін білу керек және оған қалай жетуге болатынын білу керек?
Жетістік дегеніміз – рухани әрі қуатын бір мақсатқа бағыттау және сол мақсатқа жету. Қандай да бір істі тындырымды әрі тыңғылықты істеу де – жетістік. Ойдағыдай істелген іс, жоспарланғандай атқарылған жұмыс, мұрат етілгендей орындалған арман – жетістіктің нақ өзі. Сондықтан жетістік – адам бақытының қайнар көзі. Бұл көзді қаншалықты аршыған адам өмірде соншалықты бақыт табады. Бақыт бұлағы адамға өз ләззатын берген сайын кісі бойындағы шаттық сезімде арнасынан аса түседі. Демек, адамның шаттыққа оранып, құмарлана өмірден ләззат алатын, қуанышқа бөленіп, рақаттана шат-шадыман болатын бақытқа жету жолының бірі – жетістік.
