Шанаққала шайқасына арналған фотокөрменің ашылуындағы сөз:
2017 жылғы 17 наурыз
«Ханшатыр» Осыдан дәл екі жыл бұрын, 2015 жылғы 16 сәуірде Түркия Президенті Реджеп Тайып Ердоғанның Қазақстанға ресми сапары басталған болатын. Дәл сол күні біз «Егемен Қазақстан» газетінде «Шанаққала» деген көлемді мақала жариялағанбыз.Мақала Реджеп Тайып Ердоғанның: «Шанаққала түбіндегі шайқас өзінше бір эпос. 1915 жылғы сәуірдің аяғында басталып, 1916 жылдың 16 қаңтарына дейін созылған сол шайқаста жан аямас ерлік жасалып, ғажайып жеңіске қол жеткізілді. Мұндай ұлт – ұлы ұлт, қуатты ұлт» деген сөзінің сырын ашуға арналған еді.Шанаққала шайқасы Бірінші дүниежүзілік соғыстың басты белестерінің бірі. Бұл ер түріктің басынан бағы тайып тұрған кезі. Он тоғызыншы ғасырдың аяғына қарай Осман империясында феодалдық құрылыстың дағдарысы жеріне жетіп, бітіспес қайшылықтары әбден асқынған болатын. Мұстафа Кемал – түрік армиясының тарихында подполковник шенімен дивизия басқарған бірінші адам. Дарданел бұғазындағы, Шанаққала түбіндегі шайқас Мұстафа Кемалдың жұлдызын жандырды.
