Әлем таныған Абай. Қазақты тану үшін әуелі Абайды оқу қажет. Абайды білмейтін қазақ кемде кем шығар

Әлем таныған – Абай. Қазақты тану үшін әуелі Абайды оқу қажет. Абайды білмейтін қазақ кемде кем шығар. Себебі, Абайдың артынан қалдырған мұрасы, даналығы, қазақ халқының тарихында, мәдениетінде, әдебиетінде үлкен рөл атқарып, алтын әріппен жазылады.

Абай бала күнінен зерек, ақылды, зерделі, кең ойлай білетін дара бала болып өскен. Әжесі Зеренің таусылмайтын мол қазынадай аңыз ертегілерін естіп, анасы Ұлжанның өнегелі тәрбиесін көріп, Құнанбайдай ел дауын шешкен, көрегенді әкенің тәлімін алған Абайдың өнер-білімге деген ықыласы зор болады. Он жасында әкесі Құнанбай Ахмет Риза медресесіне оқуға жіберіп, сол жақта үздік шәкірт атанып, түркі әлемінің ұлы ойшыл-философтары Фирдоуси, Науаи, Низами, Хорезми шығармаларымен сусындайды.

Міне, осындай өнеге көрген Абай ұлы философ, ақын, композитор, ағартушы ретінде қазақ әдебиетінің негізін қалады. Ол әрбір өлеңдері мен қара сөздерін қазақ халқының тұрмыс тіршілігін, әлеуметтік өмірін арқау ете отырып жазған. Абай қазақтың лирик ақыны. Оның шығармалары көптеген тілдерге аударылып бүкіл әлемге танылған. Абайды тек қазақ халқы ғана емес, әлемнің көптеген елдері ұлы тұлға, ойшыл ақын ретінде таниды, мойындайды. Әлемнің түпкір түкпірінде Франция, Венгрия, Ресей, Мысыр, Қытай, Өзбекстан, Иран, Әзірбайжан, тағы басқа елдерде Абай атасыздың ескерткіштері биік мәртебемен орнатылған.