ЭНДОКРИНДІ ЖӘНЕ ЖҮЙКЕ ЖҮЙЕЛЕРІНІҢ ӨЗ-АРА БАЙЛАНЫСТАРЫ
Эндокринді және жүйке жүйелері реттеуші қызмет атқаратын жүйелер болып табылады, сондықтан өздерінің қызметтерін атқару барысында олар бір-бірімен өте тығыз байланыста болады. Бұл жүйелердің жасушалардың, тіндердің, мүшелердің қызметтік жағдайын реттеу принциптері бір-біріне ұқсас. Олар реттеуге қабілетті заттарды – ішкі секреция бездерінде гормондарды, ал жүйке жүйесінде нейромедиаторларды өндіріп, бөлу арқылы өздерінің ықпалын іске асырады. Ішкі секреция бездері реттеуді эндокриния жолымен атқарса, жүйке жүйесі паракриния арқылы жүзеге асырады.
Бұл екі жүйенің тығыз байланысын гипоталамустың деңгейінде анық байқауға болады. Гипоталамус жүйке жүйесінің бөлігі және эндокриндік жүйенің орталық мүшесі болып табылады. Алдыңғы және орталық гипоталамустың ядроларында жүйкелік және эндокриндік жасушалардың қызметін біріктіре атқара алатын нейросекреторлық нейрондар анықталады. Бұл жасушалардың өндіретін гормондары нейромедиаторлық та ықпал жасай алады. Гормондарды өндіру және бөлу жүйке жүйесімен күрделі де нәзік түрде реттеледі. Бездерде жүйкелену мен тамырлану жақсы жетілген.
Достарыңызбен бөлісу: |
