ШЕТКЕРІ ІШКІ СЕКРЕЦИЯ БЕЗДЕРІ
Шеткері ішкі секреция бездеріне қалқанша, қалқанша маңы және бүйрек үсті бездері жатады.
ҚАЛҚАНША БЕЗІ
Қалқанша безі эмбриогенездің 3-4 аптасында 1 және 2 желбезек қалталарының жұптарының арасында жұтқыншақтың қабырғасының өсіндісі түрінде пайда болады. 3-4 желбезек қалталарының деңгейінде ол екіге жарылады да қалқанша безінің екі бөлігін береді. Бастапқы эпителий жасушаларының созындысы кері дамиды, оның біраз бөлігі ғана сақталып, бездің екі бөлігін біріктіріп тұратын қылтаны құрайды. Басқа сүтқоректілерде бездің екі бөлігі бір-бірінен оқшауланып, жеке орналасады. Мезенхима созындылардың арасына кіріп қан тамырлары мен дәнекер тіндердің бастамасы болады. Адамда нейробластылардың туындысы нейроэндокриндік парафолликулярлық жасушалар қалыптасады.
Достарыңызбен бөлісу: |
