Де Голльдің орнынан кетуі. 1968 ж. мамыр оқиғалары де Голль үшін күтпеген және ауыр соққы болды. Сайлауда жеңіп шыққанына қарамастан, ол әлеуметтік қақтығыстарды басу және оларды келісім мен әлеуметтік әріптестік арнасына түсіру үшін кейбір реформалар жүргізу қажеттігін түсінді. Олардың ішіндегі ең алғашқыларының бірі “қатысу” саясатының рухындағы жергілікті басқаруды реформалау болды. 1969 ж. сәуірде сайлаушылардың көпшілігі жергілікті басқаруды реформалаудың жобасын қабылдамай тастады. Дауыс берудің қорытындысы белгілі болысымен де Голль орнынан түсетіндігін хабарлап, жеке иелігіне кетіп қалды. 1970 ж. қарашада генерал де Голль қайтыс болды.
