Топырақты химиялық жолмен мелиорациялау. Қышқыл және сілтілі топырақтарды ауыл шаруашылығында пайдалану үшін, оларды химиялық жолмен мелиорациялайды. Өйткені қышқыл топырақта сутек пен алюминий, сортаң топырақта натрий иондарының көп болуы олардың физикалық, физика-химиялық, биологиялық қасиеттерін нашарлатады, әрі құнарлылығын төмендетеді. Қышқыл және сілтілі топырақтарды химиялық жолмен өңдеу олардың құрамына кальций катионын енгізуге негізделген. Ол үшін қышқыл топырақтарды әктейді, сортаң топырақтарды гипстейді.
