Эссе «Инфографика және оны тегін жасау сервистері»

Инфографика – бұл оқуды және жариялауды жеңілдету үшін күрделі ақпаратты ұсынудың графикалық тәсілі. Графикалық және коммуникациялық дизайн нысандарының бірі. Оның қолданылу аясы өте үлкен: география, журналистика, білім беру, статистика, техникалық мәтіндер.

1. 
   Google Docs - «Google» платформасының бұл қосымшасы статистикалық мәліметтерді жасауға арналған. «Google Docs» сіз енгізген сұралым арқылы әлем және жергілікті мекен бойынша статистикалық мәліметтерді ұсынады. Ақпаратты карта, кесте, диаграмманың бірнеше түрі арқылы бейнелеуге болады. Сонымен қатар түрлі түске бояп, керек тұсын ерекшелей аласыз. «Google Docs»-пен жұмысты бастамас бұрын нұсқаулықпен танысып шыққаныңыз жөн.
   
2. 
   Easel.ly – ағылшын тіліндегі ыңғайлы сервис. Бұл сервис арқылы кез-келген адам инфографика жасай алады. Сервистің тегін нұсқасында 10 дайын шаблон, 65 инфографикалық белгі, 25 сурет, 10 түрлі қаріп, графиктің 4 түрі, jpeg форматында жүктеу мүмкіндігі бар.
   
3. 
   Pictochart.com - сервисінің ақылы және тегін тарифі бар. Тегін тарифіне түрлі графиктер, суреттер қосылған. 10 түрлі шаблонның ішінен өз тақырыбыңызға ұқсасын таңдап алуыңызға болады. 100-ден аса түрлі символдар мен белгілерді табуға болады. Ал мәтініңізді түрлі қаріппен тере аласыз. Дайын суретті бірнеше форматта сақтауға және жүктеуге болады.
   
4. 
   Canva.com – сервисінің мобильді телефонға арналған қосымшасы да бар. Оның құрылымы «Piktochart.com»-ға ұқсас. Бірақ «Canva»-ның мүмкіндіктері көбірек. Мұнда дайын шаблондар тақырып бойынша бөлінген. Графиктер мен диаграммалардың да түрі жетерлік. Бір кемшілігі ақылы және тегін құралдар аралас орналасқан. Таңдау барысында сізді шатастыруы да мүмкін. Дайын өнімді «png» форматында жүктей аласыз.
   
5. 
   Visme.com – ағылшын тіліндегі интерфейсі қарапайым сервис. Бұл сервис арқылы күрделі ақпаратты сурет арқылы бейнелей аласыз. Оның тегін нұсқасында көптеген дайын шаблондар мен фондар, қаріп түрлері, графиктер, сызбалар, диаграмма және карталар, графикалық суреттер, бейнежазба түріндегі инфографика жасау, jpeg форматында жүктеу мүмкіндіктері енгізілген.
   
6. 
   Prezi.com - пайдаланушы сайтта ұсынылған көптеген үлгілердің ішінен дайын үлгіні таңдай алады немесе оны өз бетімен жасай алады. Слайдтар бір кеңістіктің бөліктері болып табылады және онда кездейсоқ орналасады. Оларды әртүрлі нүктелерге жылжытуға, көлемін кішірейтуге және үлкейтуге, бір слайдты екіншісіне орналастыруға, айналдыруға болады. Слайдтағы мәтін де анимацияланған. Prezi қолданбасы Power Point презентацияларынан суреттерді, анимацияларды (swf пішімінде), бейнелерді (сонымен қатар YouTube сайтынан), музыканы, әртүрлі диаграммаларды және слайдтарды кірістіруді қолдайды.