ТЫНЫС АЛУ ЖҮЙЕСІНІҢ АУРУЛАРЫ БАР НАУҚАСТАРДЫҢ ТЕКСЕРУ ӘДІСТЕРІ. Басты синдромдары. Өкпе тінінің ошақты тығыздалу синдромы
Ұзақ уақыт өкпе қабынғанда немесе өкпе ісікпен қысылғанда өкпе тінінің ошақты тығыздалу синдромы дамиды, себебі – альвеолалар қабыну экссудатпен және фибринмен (пневмонияда), қанмен( өкпе инфарктісінде) толады және өкпе бөлігі дәнекер тінмен өсіп кетіп (пневомосклероз), тығыздалады.
Негізгі шағымы – ентігу, жалпы қарағанда кеуде қуысының зақымдалған жағы тыныс алуда қалып қояды, дауыс дірілі өкпе тығыздалу ошағында күшейеді, өкпе тығыздалған жерде перкуторлы дыбыс бәсендейді немесе тұйық дыбыс шығады, аусультация жүргізгенде – бронхильді тыныс естіледі, бронхофония күшейеді. Майда бронхтарда сұйықтық жиналса ылғалды сырылдар пайда болады. Рентгенде қара дақ көрінеді( өкпе тінінің мөлдірлігі төмендейді), дақтың көлемі мен формасы аурудың түріне және сатысына байланысты болады.
