210. Арықтағы қасқыр. Ойыншылар саны: 10-30 адам. Өткізетін орын: спорт зал, спорт алаңы.
Ойынға дайындық: Алаң ортасына қос сызық сызылады. Ол қос сызық «арық» болып есептеледі. Арықтың екі жағына екі үй орны белгіленеді. Ойыншылардың арасынан «қасқыр» сайланады. Ол «арық» ішінен орын алады. Қалған ойыншылар «ешкілер» бірінші үйге орналасады.
Ойын мазмұны: белгі бойынша «ешкілер» жүгіріп арықтан секіру арқылы келесі үйге өтулері қажет. «Қасқыр» арықтан секірген «ешкілерге» қолын тигізіп ұстап алуы керек. Ұсталғандар ойыннан шығып шетте демалады. Ойын осылай жалғаса береді. Ұсталмаған ойыншы жеңіске жетеді.
Ойын ережесі: Ойын жетекшінің белгісі бойынша басталады, оған көмекші 1-2 қараушы сайланады; арық сызығын басып өтуге болмайды; «қасқырдың» арықтан шығып кетуіне құқығы жоқ; ойыншылар жүгіріп келіп арықтан бір немесе екі аяқпен секірулері қажет.
Ойынның басқа нұсқасы: ойыншылар санына қарай ұсталған ойыншылар арасынан екі немесе үш қасқыр сайлауға болады.
Әдістемелік нұсқаулар: ойынға қатысушылар саны көп болған жағдайда ойыншыларды бірнеше топқа бөліп өткізген тиімді. Арықтың қашықтығын мейілінше ұзартуға немесе қысқартуға болады.
Ойынның педагогикалық маңызы: ойын оқушылардың жүгіру, ұзындыққа секіру қабілеттерін дамытып, жетілдіреді.
211 Алға және кері секіру Ойыншылар саны: 10-30 адам. Өткізетін орын: спорт зал, спорт алаңы.
Ойынға дайындық: алаң ортасына үш метр сызық сызылады. Ойыншылар теңдей екі топқа бөлінеді. Жетекші қай топ бірінші бастайтынын жеребе тастау арқылы анықтайды.
Ойын мазмұны: жетекшінің белгісі бойынша бір ойыншы сөре сызығында тұрып қос аяқпен барынша алға секіреді. Жетекші секіріп түскен ойыншының өкше тұсынан сызып белгілейді. Сол белгіленген сызықтан қарсы бағытқа келесі топтың ойыншысы секіреді. Барлық ойыншылар секіріп болғанша ойын жалғаса береді. Ең соңғы ойыншы сөре сызығынан асып секірсе, сол топ жеңіске жетеді.
Ойын ережесі: сызықты басып секіруге болмайды; ойыншының секірген ұзақтығы сөре сызығына ең жақын жерден белгіленеді; әрбір ойыншының тек бір рет қана секіруге құқығы бар.
Әдістемелік нұсқаулар: ойынды жұмсақ жерге өткізген дұрыс. Спорт залда өткізгенде төсеніш құралдарын пайдаланған жөн. Ойын басталар алдында орында тұрып секіру тәртібін қайталаған дұрыс. Ойында өлшеуіш құралын қолдану керек.
