52 Қол күрес (Білек сынасу) Ойынға қол күшін сынағысы келген барлық адамдар қатыса алады. Адамдар еріктерімен қарсыластарын өздері таңдап алады. Қазіргі кезде қол күресінен жеке спорт түрі ретінде жарыстар өткізіліп, спортшылар жас және салмақ дәрежелеріне бөлінеді. Екі адам оң немесе сол қолдарының шынтағын столға, жерге тіреп бірінің қолын бірі алақандастыра мықтап ұстайды. Екінші бос қолдарын еш жерге тіремей, немесе келісім бойынша бір заттан ұстайды. Ойын бастаушы белгісі бойынша ойыншылар алақандарымен ұстасқан қолдарының шыңтақтарын орнынан қозғамай, жерден көтермей қарсыласының ұстаған алақанының сыртын жерге тигізіп жығуы қажет. Қол күресі оң және сол қолдары күштерін бірнеше рет сынап күрестіреді.
53. Қыз қуу Қыз қуу – көп тараған қазықтың ұлттық ойындарының бірі. Халқымыздың тұрмыстық жағдайында тек ерлер ғана емес, сонымен қатар қыздар да ат үстінде жақсы отырулары керек болған. Сол тұрғыдан, ер балалар мен қыздар үлкен той думанда сыннан өтіп, өздерінің күш қайраты мен ептілігін, атқа мығым отыратындықтарын паш етіп отырған.
Қыз қуудан арнайы дайындықтан өткен, жарыс шартын білетін адам ойынға қатысуға мүмкіндік алады. Ойынға қатысушы әрбір адам қолына қамшы алуға міндетті.
Жарысқа қатысатын қыз, жігіт әдемі ұлттық киім киюге міндетті.
Қыз қуу ойыны өтетін жер. Қыз қуу ойыны жарыс өтетін жер ұзындығы 300 метрден астам, ені 30-40 метр тегіс жер болуға тиісті.
Қыз қуу ойынын өткізу ережелері.
Сөре басында қыз жарыс басталарда жігіттен он метрдей алда болады, төреші қолындағы жалауды түсіріп, дауыстап белгі берген кезде қыз қашады, ал жігіт қуа жөнеледі, арадағы 300 метр қашықтықта, жарыстың шарты бойынша, жігіт қызды қуып жетуге тиіс. Ойынның мақсаты жігіт сол аралықта қызға жетіп сүюі шарт, егер жігіт сол жол аралығында қызға жете алмаса, жігіт жеңілді деп есептеледі. Ал қайтар жолда жігіт қыздан қашады, арадағы 300 метр қашықтықта қыз жігітті қуып жетсе, ол қолындағы қамшысымен жігітті және оның атын ұруына болады.
Ойын шеберлігі бес балдық жүйе бойынша бағаланады. Бағалауға жылқыны басқару көркемдігі және шабыс шапшаңдығы, жарысқа қатысушылардың әдемі ұлттық киімдерінің жарасымдылығы мен жылқының әсем тұқымдылығы және түсі бағаланады.
