83. Мыршым Ойынға қатысушылар бір адамды іздеуші етіп тағайындайды да, оны топтан бес-алты қадам қашыққа барып теріс қарап тұруын сұрайды. Осыдан кейін қалған ойыншылардың бірінің аузына кішкене құрт, кәмпит, немесе тиын салып қояды. Іздеушіні шақырып алған кезде, барлық ойынға қатысушылар «мыршым-мыршым» деген сөзді үздіксіз қайталап айтулары тиіс. Іздеуші кімнің аузында заттың тұрғанын табуы керек. Ол үшін іздеуші әркімнің қасына барып тыңдап тұруына болады. Егер тапса, аузына құрт жасырған адам іздеуші болады, таба алмаса өзі өнер көрсетеді.
