Сәтбаев қаласының орталықтандырылған кітапхана жүйесі Сәтбаев қаласының тау-кен кәсіпорындары

«Қазақмыс» корпорациясына қарасты «Жезқазғантүстіметалл» өндіріс-тік бірлестігінің «Степной» кеніші өндіріске кейінгі жылдарда қосылған, келешегіне зор үміт күттіретін іргелі өндіріс ошағы. Степной кеніші Жезқазған мыс орнында жер астынан кен қазу және өндіру үшін 2005 жылы құрылған. Кеніште 780 адам еңбек етеді. Мұның ішінде 502 адам тереңде түрен салып жатқандар. Кеніштің құрамында №67 және №70-ші екі шахта бар.

«Қазақмыс» корпорациясына қарасты кеніштердің ішіндегі кен қоры мол, сапасы да жоғары кеніштердің бірінен саналатын Степной кенішінің келешегі де кемелді. Кен қорының негізі №70 шахтаның аумағында жасақталған. Тыңға түрен салып, кен бетін ашу, шалғай панельдерден кен қорын жасау Жезқазған шахтапроходкалау тресінің проходкашыларының күшімен атқарылады. Қазір кеніште 4 проходкашылар бригадасы жұмыс істейді. Кен өндіруде кеніштегі 4 өндіруші учаскелер тұрақты түрде жұмыс істейді. Өндірілген кен забойдан кен тиеу орнына дейін ТОРО-40 және ТОРО-50 автоаударғыштарымен тасылады. Мұның сыртында кенді тасымалдау жұмысын жеделдету, шығынды азайту және материалдарды үнемдеу мақса-тында конвейерлік әдіс те қолданылады. 140-горизонтта ұзындығы 4 шақырымға жететін конвейер орнатылған. Конвейер жұмысын жеңілдету үшін 3 кен түсіретін жерлерде шағын кен ұнтағыштар орнатылған. Міне, осы қондырғылардың тоқтаусыз жұмыс істеуі, жұмыстың жүйелі түрде жоспарлануы көздеген межеден көрінудің басты тетігі.

Келешекке мол кен қорын жасау жұмыстары да ойдағыдай жүргізілуде. Мәселен, 52,5 миллион тонна кеннің беті ашылған. Құрамында 0,77 пайыз мысы бар 11,9 миллион тонна кен әзірленді. Кеніш 0,78 пайыздық мыс құрамы бар 5,0 миллион тонна кен қорын игеруде.