Сонда айналадағы ортадан ойша бөлінген дене немесе өзара әрекеттескен денелер тобы термодинамикалық жүйе деп аталады. Мұны бұдан былай тек жүйе деп қарастырамыз. Жүйе айналадағы ортадан белгілі бір нақты (фазааралық) бет арқылы бөлінеді және жүйедегі молекулалар саны өте көп болуы керек. Өйткені, термодинамикада молекулалар саны аз жүйелер қарастырылмайды.
Жүйенің айналадағы ортамен әрекеттесуі әртүрлі, мәселен: механикалық, жылулық, энергияның басқа да түрімен, заттармен де алмаса алады. Егер осы байланыстардың ешқайсысы да болмаса, ондай жүйелер оқшауланған жүйелер деп аталады.
Айналадағы ортамен зат алмасудан басқа байланыста болатын жүйелер тұйық жүйелер (жабық) деп аталады. Тұйық жүйеге: ішіндегі заты бар жабық ыдыс, баллондағы газ немесе беті жабық стакандағы ыстық ерітінді т.б. мысал бола алады.
