Гликогеннің ыдырауы Гликогеннің маңызды қасиетінің бірі - оның организмнің қажет етуіне қарай қор ретінде жиналатындығы және ыдырап глюкозаға айнала алатындығы. Гликогеннің ыдырау процесі гликогенолиз деп аталады. Қан құрамындағы глюкоза мөлшері төмендеген кезде адреналин және глюкагон гормондарының әсерінен цАМФ синтезі күшейеді де гликогенолиз процесі жүреді. Гликогеннің бұлшық етте көбірек ыдырауын адреналин іске асырады, глюкагон гормоны гликогеннің бауырда ыдырауына күштірек әсер етеді.
Гликогеннің бұлшық еттерде ыдырауының бауырда ыдырауынан айтарлықтай айырмасы бар және глюкозо-6-фосфат түзілгеннен кейін әр түрлі жолмен жүреді. Бауырда глюкозо-6-фосфат гидролизденеді де, бос глюкозаға және минералдық (органикалық емес) фосфатқа бөлінеді. Бұдан кейін глюкоза қанға қосылады. Қанмен бірге ең алдымен каңқа бұлшық еттеріне және миға барады. Оның үздіксіз келіп тұруы бұл мүшелер үшін аса қажет. Бұлшық етте гликоген глюкозо-6-фосфат арқылы пируватқа дейін тотығады. Пируват бұдан кейін тотықсызданып, лактатқа айналуы мүмкін. Бұл процесс гликолиз деп аталады, ол кейінірек қарастырылады. Енді гликогеннің бауырда глюкозаға айналуын қарастырайық.
Гликогенолиз мынадай кезеңдерден тұрады:
