Аққу, Шортан һәм Шаян
Жүк алды Шаян, Шортан, Аққу бір күн,
Жегіліп тартты үшеуі дүркін-дүркін.
Тартады Аққу көкке, Шаян кейін,
Жұлқиды суға қарай Шортан шіркін.
Бұлардың машақаты аз болмады,
Жұмысы орнына кеп мәз болмады.
Тартса да бар күштерін аямай-ақ,
Асылы, жүк орнынан қозғалмады.
Осыншама ол жүк артық ауыр емес,
Құр сырттан «пәлен» деу де тәуір емес.
Жүк бірақ әлі күнге орнында тұр,
Бірыңғай тартпаған соң бәрі тегіс.
Жігіттер мұнан ғибрат алмай болмас,
Әуелі бірлік керек, болсаң жолдас.
Біріңнің айтқаныңа бірің көнбей,
Істеген ынтымақсыз ісің оңбас.
Бұл жерде Тақырып: Бір ел, қауым үлкен бір саяси не әлеуметтік істі қоғам болып бірігіп атқармақшы болды. (Аққу, Шаян, Шортан жүк сүйремекші) Проблема: осындай істі атқару кезінде алауыздық туды: (жүк орнынан қозғалмады). Идея: Ала ауыз боп бұндай іс атқарылмайды.
Достарыңызбен бөлісу: |
