Қазақстанның ірі мемлекет қайраткері, ұлт жанашыры, ел қамқоры, халқымыздың біртуар перзенті

ҚР Тұңғыш Президентінің білім ордасы – Қарағанды мемлекеттік техникалық университетінде болашақ мамандарды тәрбиелеу ісіне үлкен көңіл бөлінеді. Терең уәждемелі дәйектемеге және оқу мен оқудан тыс қызметтің барлық түрлерінде жастармен жұмыстың интерактивті нысандары мен әдістерін пайдаланатын жаңа технологияға негізделген патриоттық тәрбиені ұйымдастырудағы жүйелі тәсілдеме түлектеріміз бойында жоғары азаматтық ұстанымды, азаматтық жауапкершілік сезімін, яғни отаншылдықты құрайтын қасиеттерді қалыптастыру үдерісін қалады.

Міне нақ сондықтан ҚарМТУ студент жастарды тәрбиелеудің жаңа үлгісін талқылаудың республикалық платформасына айналды. Жаңа Қазақстандық Патриотизмнің идеялық негізі осы мемлекет құраушы, жалпыұлттық құндылықтарда жатыр. Оқу-білім үрдісінде тарихты тұлғалар арқылы тану бұрыннан бар десек те, соңғы үш-төрт жыл бедерінде біздің білім ордасында жас ұрпақты осындай тұғырлы тұғырлардың үлгі-өнегесі тұрғысында тәрбиелеу тәжірибесі қалыптасты.

«Озық тәжірибе – көпке ортақ» дегендей, университетімізде берісі облыс, әрісі республика жұртшылығының назарын аударарлық игілікті де ілкімді іс-шаралар жиі өткізіліп тұрады.

Осы орайда, ұлт пен ұлысымыздың бірегей тұлғаларының бірі, ірі мемлекет қайраткері, ел қамқоры, халық ардақтысы – Жұмабек Ахметұлы Тәшеневтің 100 жылдығын алқалы жиынмен атап өткенді жөн көрдік.

Конференция жұмысына ҚР Парламенті Мәжілісінің депутаты, экономика ғылымдарының докторы, ҚарМТУ-дың құрметті профессоры Тұрсынбек Қазенұлы Өмірзақов, Халықаралық ақпараттандыру академиясының академигі, Халықаралық өндірісті ұйымдастырудың ғылымы мен практикасы академиясының академигі, экономика ғылымдарының докторы, ҚарМУ профессоры, тәшеневтанушы Рашит Саттарұлы Каренов, ҚазМУ профессоры, тарих ғылымдарының кандидаты Фатима Садыққызы Тәшенева, Л.Н. Гумилев атындағы ЕҰУ профессоры, тарих ғылымдарының докторы Мақсат Алпысбес, белгілі ақын, драматург, мәдениет қайраткері Баянғали Әлімжан, ҚР БҒМ ҒК Мемлекет тарихы институтының аға ғылыми қызметкері, тарих ғылымдарының кандидаты Қанат Еңсенов, ҚР Ұлттық мұражайының бөлім бастығы Жанар Сағымбайқызы Бейісова, ҚР БҒМ ҒК Мемлекет тарихы институтының жетекші ғылыми қызметкері, педагогика ғылымдарының кандидаты, «Жұмабек Тәшенев» кітабының авторы Сейтқали Жахияұлы Дүйсен, жазушы, тәшеневтанушы Мейрам Жолтайұлы Байғазин және басқа да құрметті меймандарымыз қатысып отыр.