3 – сұрақ. Ішкі мүшелер негізінен сірлі қабықпен астарланған: көкірек қуысында (cavum thoracis) және құрсақ қуысында (cavum abdominis), сондай-ақ, сірлі қабықпен жартылай астарланған жамбас қуысында (cavum pelvis) орналасады.
Сірлі қабықтар – дене қуыстарының ішкі беттерін астарлаумен қатар, дене қуыстарында жатқан ішкі мүшелерді сыртынан қаптап, дене қабырғасы мен ішкі мүшелер аралықтарындағы сірлі қуыстарды түзеді. Сірлі қуыстарға: плевральды, перикардиальды, перитонеальды және қынаптық сірлі қуыстар жатады.
Көкірек қуысы ішкі жағынан көкрекіштік шандырмен (fascia endothoracica) және сірлі қабық – плеврамен (pleura) астарланған. Көкірек қуысының ішкі бетін астарлайтын плевраны қабырғалық немесе париетальды плевра, ал қуысындағы ішкі мүшелерді сыртынан қаптап тұратын плевраны іштік немесе висцеральды плевра дейді.
