Көз алмасының қабықтары І.Талшықты қабық - көз алмасын сыртынан қоршап, қорғаныш қызметін атқарады. Оның артқы үлкен бөлігі – ақ қабық, алдыңғы бөлігі мөлдір қабық деп аталады. Олар бір – бірімен циркулярлы жүлге арқылы бөлінеді.
1.Ақ қабық, sclera - тығыз дәнекер тіннен тұрады, ақ түсті, оның 2 қабық арасындағы көрінетін бөлігі көздің ағы деп аталады. Жарық көз алмасы ішіндегі торлы қабықтың жарық сезгіш элементтеріне жету үшін, талшықты қабықтың алдыңғы бөлігі мөлдірленіп, мөлдір қабыққа айналады.
2.Мөлдір қабық, cornea – ақ қабықтың тікелей жалғасы, мөлдір, дөңгелек, алдына қарай дөңес те, артқы жағына қарай ойыс табақша тәрізді, сағат әйнегіне ұқсас, өзінің жиегімен ақ қабыққа кіріп тұрады.
ІІ.Көз алмасының тамырлы қабығы, tunica vasculosa – тамырларға өте бай, жұмсақ, пигменттерге орай қара түсті, дәл ақ қабықтың астында жатады. Онда 3 бөлім болады: 1) меншікті тамырлы қабық; 2) кірпікті дене; 3) нұрлы қабық.
1.Меншікті тамырлы қабық, choroidea- тамырлы қабықтың артқы үлкен бөлімі. Акомодация кезінде ол үнемі жылжып тұрады, сондықтан бұл жерді екі қабық арасында саңылау тәрізді лимфалық кеңістік пайда болады.
2.Кірпікті дене, corpus ciliare - тамырлы қабықтың алдыңғы жуан бөлігі, циркулярлы буылтық түрінде ақ қабықтың ауысатын жерінде орналасқан. Кірпікті дененің кірпікті шеңберінің алдында 70 шақты жіңішке радиарлы жатқан, ақшыл түсті кірпікті өсінділер болады, олар сұйықтық - камералар ылғалын бөліп шығарады. Аккомодациялық бөлік кірпікті дене қабатында - кірпікті өсінділерден сыртқа қарай жататын еріксіз бұлшық еттен түзіледі. Бұл бұлшық ет үш бөлікке бөлінеді: сыртқы – меридионалды, ортаңғы –радиал- ды, ішкі – циркуярлы. Бұлшық еттің негізгі бөлігі - меридионалды талшықтар, ақ қабықтан басталып артқы жағында меншікті тамырлы қабықпен аяқталады. Көзді жақын қашықтыққа аударғанда олар жиырылып, меншікті тамырлы қабықты керіп, көзбұршақтың қапшығын босаңсытады – бұл аккомодация деп аталады. Циркулярлық талшықтар кірпікті өсінділердің алдыңғы бөлігін жылжыта отырып, аккомодацияға көмектеседі, сол себепті аккомодация аппаратына көп салмақ түсетін алыстан көргіштерде күшті дамыған. Бұлшықет талшықтары балаларда көбіне меридионалды талшықтардан, ал қарттарда циркулярлы талшықтардан тұрады.
