Мен Айгүл Аликқызы келешекке білім атты гүлдің қызғалдағын үзіп алып таратсам деген арманмен ұстаздық жолдың ауыр жүгін өз жүрегімнің қалауымен таңдап алдым. Сондықтан ұстаздық жолда адал міндет атқаруды өзіме мақсат етіп қойдым. Аталған мақсатты жүзеге асыруда мектепте істеген аз уақыттың ішінде өзіндік педагогикалық философиям және ұстанымым қалыптасты. Әр бала өзінше жеке, әрі қайталанбас тұлға. Сондықтан баланың жан дүниесін түсіне білу, оларды жақсы көру, өзіңнің жанына жақын тарту менің негізгі ұстанымым. Сонымен қатар баланы жеке тұлға ретінде қабылдау, бала пікірімен санасу және қоғамда өз көзқарасы қалыптасқан, бәсекеге қабілетті, өзін көрсете білетін, шығармашыл тұлғаны қалыптастыра білу. Осы ұстанымдарым негізінде ұстаздық жолда қызмет жасаудамын. Ұстаздық қызметте, шәкірттермен қарым-қатынаста ізгі ниеттілік, кішіпейілділік және мәдениеттілік бірінші кезекте тұру керектігіне көзім жетті. Бүгінгі жаһандану заманында ұлттың бәсекеге қабілеттілігі білім деңгейімен өлшенеді. Сондықтан, ертеңгі келер күннің бүгінгіден нұрлы болуына апаратын жол- білім. Тек білімді ұрпақ қана қоғамға қозғаушы, басшы болары сөзсіз. Бұл орайда ұстазға артқан сенім өте зор. Осы еңбек жолында 2017 жыл «Ғажайып математика» атты қолданбалы курс авторлық бағдарламасын құрастырдым. Бұл бағдарламаның мақсаты:
Логикалық тапсырмалар арқылы жеке тұлғаның өзіндік ойлау қабілетін дамыта отырып, байқағыштыққа, шапшаңдыққа, ойын еркін дәлелдеуге, ізденімпаздыққа үйрету.
Міндеттері:
1. Баланың сабаққа деген қызығушылығы артады.
2. Көздеген мақсатқа жету үшін өз бетінше іздену әрекеттері қалыптасады.
3. Негізгі ойлау операцияларын саналы түрде қолдана білуге үйренеді.Яғни, ақпаратты сауатты қолдана білуін қалыптастыру.
4. Қиялдау, елестету және шығармашылық ойлауын дамыту.
5. Өз пікірін айту және дәлелдеу, дұрыс сөйлеу дағдыларын қалыптастыру.
6. Алған білімдерін күнделікті өмірде қолдана білуге үйрету және тәрбиелеу.
7. Қойылған мақсатқа жету үшін қажетті ерік-жігерлерін дамыту.
Күтілетін нәтиже
-баланың тұлға ретінде қалыптасуына, оқушының ақыл-ойын дамытуға, интеллектуалдық және ерік пен сезімге қатысты белсенділігін қалыптастыруға мүмкіндік туғызады;
-математиканың өмірде болып жатқан нақты құбылыстарды жалпылауға және қоршаған болмысты танып-білуге көмектесетін ғылым болып табылатыны туралы түсініктердің қалыптасуына ықпал етеді;
-оқушының өмір сүруіне және мектептің келесі деңгейінде оқуын жалғастыруы үшін қажетті білім, білік және дағдыларды қалыптастырады.
Бағдарлама мазмұнында оқушылардың математикалық сауаттылығын, білім, білік дағдыларын тексеруге арналған тапсырмалар топтамасынан тұрады. Баланың шығармашылық шеберлігін бірден дамыту мүмкін емес. Сол себептен танымдық тапсырмалар арқылы баланың интеллектуалдық және шығармашылық мүмкіндіктерін қалыптастырып, бір жүйеге келтіру қажет. Танымдық тапсырмалар қазіргі заманғы жаңаша оқыту тәсілдері арқылы берілді. Бұл тапсырмаларды орындау барысында ең алдымен жеткілікті көлем мен жүйелілік пен мақсаттылық болуы керек. Тапсырмалар баға қоюға емес, оқыту мен дамытуға арналған. Сол себепті бұл тапсырмалар жеке тұлғаның өзіндік ойлау қабілетін дамыту мен қалыптастыру болып табылады. Яғни, назар аудару, елестету, есте сақтаудың түрлері, сұрыптау, зейінді дамыту және ойша тұжырымдама жасау. Олар оқушыны ойлана білуге баулып, оның логикалық ойын дамытып, пәнді оқып-үйрену барысында алған білімін кеңейте түсуге тиімді. Оқушының білім деңгейі, іскерлік дағдыларына сәйкес сұрақтар мен тапсырмалар арқылы берілген. Сонымен бірге, тапсырмалардың пәнді терең меңгертуге үлкен көмегі бар. Әр сабақ сайын тапсырмалар қиындайды, көлемі көбейіп, тапсырманы орындау жылдамдығы артады. Берілген құралды бастауыш сынып мұғалімдеріне қолданбалы курс ретінде математика пәнінен 4 сыныпқа пайдалануға болады.
|
