Ілияс Жансүгіровтің туындыларын көрсетіңіз

1. Іңірде баяулаған дауыл бәсең,

Боздатқан бұлбұл күйін бабыңда әсем.

Асықтар алқымдасқан, мауқын басқан,

Сырласқан: «жарым да сен, жаным да сен!»

Әдемі үн айтақтаған, қой күзеткен,

Адамды - адам күткен, уһлеткен.

Самалдай сайдан соққан саңқылдатқан,

Әлдилеп қоңыр түнді қос бойжеткен.

Кейде күй талмаураған, талықсыған,

Кейде өжет, кейде долы, албытсынған.

Кейде паң, кейде дарқан, кейде сергек,

Шаршы өрге кейде шапшып шауып тынған.

2. Қағылды кейде бір күй дабылдай боп,

Бұрқырап кетгі түтеп дауылдай боп.

Әлде күш, әлде дауыл, әлде ат шапқан,

Әйтеуір қырдан көшкен сарындай боп.

Мұз еріп, қатты аяздың кәрі қайтып,

Қас батыр көңілі жұмсап, зәрі қайтып.

Майрылып ақ семсерлер қалайы боп,

Қажытты мұзбалақты күй мұңайтып.

Құлпыртып бәйшешекті кетті шалқып,

Аққудай көкте күйлеп, көлде қалқып.

Ақтарып, лекілдетіп, лепілдетіп,

Талдырып, тамшылатып сығып сарқып.

Біресе ағытылып күй сылдырлап

Тербетіп тыңдағанның көңілін ырғап,

Бұлақтай таудан тасып, тастан орғып,

Аңқылдап жатыр жосып сайды құлдап.

Күлдірлеп қоңыраудай, күй сыңқылдап

Бота күй маймаң қақты үн былқылдап.

3. Келмеске күйші аттанды. Күй қалды да,

Оқтай боп суық хабар тиді-ау мына

Қазақтың  даласына сыймай кетті,

Домбыра шанағына сыйған мұра.

Келмеске күйші кетті. Күйі қалды,

Біртуар бірегейім, биік, арлы.

Бақиға аттанардың соңғы сәті -

Өмірдің өлім деген сыйын алды.

Келмеске кетті, бірақ... Күй боп мәңгі

Арайлап атқан әрбір сүймек таңды.

Сапары саңлағымның күрт үзіліп,

Қатары ағалардың сиреп қалды.
4. Бір үйде қобыз даусы шымыраған

Күңіреніп кейде, бірде ыңылдаған.

Бір кезде бебеу қағып, күшіктей боп

Қыңсылап, сыңсығандай күй жылаған.

Бір үйде домбыра да ыңыранған

Қыр күйі құлдыраған, бұлдыраған,

Қос ішек «Қосбасарды» сылқылдатып,

Жүректі жұлып жеуге күй жынданған.

Шыңғыртып, шымырлатып, сорғалатып,

Мың түрлі күйге салып толқынтады,

Маңайда жан біткенді таңырқатып.

Қой жатыр, қойшы тыңдап тұрды елбіреп,

Көзіне қып-қызыл боп жас мөлдіреп.

Жел соқпай, құс шуламай, бәрі жым-жырт,

Әнге көңіл жіберіп тұрды елжіреп.