157. Сайыс ойыны Салт атқа отырған екі ойыншы арасында найзаны қолданып сайысқа шығу түрі. Сайысқа ұшы доғалданған найза қолданылады. Ат үстінде найзаны қолданып жарыстар өткізу барысында жарақат алмау, денсаулыққа зиян келтірмеу шараларын қамтамасыз ету басты болып саналады. Сайыс мақсаты бойынша салт атты жігіттер бір-біріне жақын келіп, найзаларын бір-бірінің денелеріне тіреу арқылы қарсыласын ертоқым үстінен аударып түсірулері қажет.
158. Ат ерттеу Ат ерттеу – атқа ертоқымды жылдам салу. Әр аттың ерекшелігін ескеріп арнайы ертоқымдар жасау дұрыс болып саналады. Ат ерттеу жарыстарына барлық жастағы ер және әйел адамдар қатыса алады. Ат ерттеу жарыстары ас бергенде, келінді көргенде, Наурыз және тағы басқа мейрамдарда өткізіледі.
Кім ертоқымды атқа бірінші дұрыс әрі жылдам ерттейді сол жеңімпаз атанады. Сонымен қатар төрешілер ертоқымның сәндігі және жасалу ерекшелігін де жеке бағалайды.
